Dat kannst mi glööven!
Eine Karken — Mudder Karken

vun Heinrich Siefer


To'n Anhören hier klicken:


Lesen deit Heinrich Siefer.


Hier 'nen Karktorn, uk dor 'nen Karktorn
Hier 'ne Karken, nett so as dor.
Hier roopt se to Gott, jüst so uk dor.
Hier döopt se de Kinner, nett so as dor.
Dor leevt Christen, nett so as hier.
Levt se anners? Worüm leevt se nich tohope?


Hammer Karken in'n Winter: Dat Krüüz lücht dör allens Gewirr

Vör Johren heff de Theologe Lothar Zenetti disse Fraogen stellt. Fraogen, de mi all as Kind in de lüttken Schaule domaols in mien Dörp faoken dörn Kopp schaoten sünd. Wenn wi Religionsunnericht harn, kunnen aaltied twei Wichter all naoh Huus gaohn. Se wörn evangelsk. Man se kennden jüst so as ik dat Vaderunser. Se güngen jüst so as all de annern ut use Klasse sönndaoges naoh Karken. Man doch hörden se nich d'rto. Wat dor för 'n Verscheel tüsken us was, un of dor överhaupt Verscheel was, dor wüdd nich över prootet. Un wenn in usen Dörp en jungen Bussen naoh'n evangelsk Wicht freide, wüdd seggt: "Gaoh mi nich över den Jordan!" Jo, tüsken de beiden Konfessionen was 'n Grenz, dor dröffde man nich röver. Uk wenn kienein so recht wüssde, worüm nich. In 'n Alldag levden evangelske Christen nich anners as kathoolske Christen. Un vandaoge weet ik, dat wi bi veele Fraogen gor nich so wiet ut'neine bünd. Dat beleve ik faoken in us plattdüütsch ökumenisch Warkkoppel un uk in mien Arbeit bi us in de Akademie.


Sien Woort is dat, üm dat dat geiht

De Geschichte heff de Christenheit utnanner brocht. Doch Martin Luther wull gor kien tweede Karken. He wull de Kark reformeern, weer up 'n Padd to un mit de Mensken bringen. Un dat is doch de Upgav van de Karken: evangelsk, of kathoolsk. Wenn de Christen Jesus un sien Evangelium vandaoge ernst nehmen willt, mäöt't se aals versöken, üm weer eens to weern. Wo dat ustseihn kann, hebb ik belevet, as ik för 'n Tied in dat lüttke Dörp Taizé in Frankriek wäsen bün. Dor verseuket Christen mitnanner ehrn Gloven to fiern un de Ökumene to leven. Duusende van junge Lüüe kaomt dat heele Johr över dor tosaomen. Se singt, bäet un fiert tohoope — un dat över den Jordan weg. Taizé is för mi ein Bispill för dat Hopen, dat alle Christen eens gooden Daoges weer eens bünd. Wo wi doch eegens de glieke Mudder hebbt:

Usen Vaoder in 'n Himmel, de us so lev heff as en goode Mudder.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


22.10.2017


na baven