Dat kannst mi glööven!
Vincent van Gogh: De Karken in Auvers

vun Heinrich Siefer


To'n Anhören hier klicken:
Lesen deit Heinrich Siefer.


Een Film, maokt bloß ut Biller van den Maoler Vincent van Gogh — kann dat wat wäsen, hebb ik dacht, as ik van den Film "Loving Vincent — Vincent, vull van Leevde" hört hebbe. Man nee, de Film röögt een an. De Biller röögt een an. So as dat Beld van de Karken Mariä Himmelfohrt in Auvers in Südfrankriek.

Steiht man vör dat Beld, fallt forts de düüsterblawe leddige Himmel up. Kiene Steerns, kiene Sünne, kien Lecht. Över de Müürn van de Karken ligget griesen Schadden.
Gewaltig steiht se dor. Vertellt van fröher, so as 'n Denkmaol. Man lebennig schinnt se nich. De Toornklocken van de Karken heff kiene Wiesers, uk kiene Taohlen. Ehr Tied is schients vörbi.

Jao, för van Gogh was de Tied för de Karken vörbi. Dat was vör Johren noch anners wäsen. He was mit de Karken upwassen. Sien Vaoder was Pastor. Un uk sien Weg was schients so vörteiket. Uk he wull Pastor weern. He studeierde, wat üm leip stuur fallen dö. Man tolessde klappde dat doch. He kreeg een Stäe in Belgien, inne Borinage bi de Bargarbeiters. Weust arme Lüüe. Nicks as Elend, Not un Dood. Hier is van Gogh sienen Gloven quiet worn. He kunn nich mehr an den gooden Vaoder in 'n Himmel glöven, bi all dat Elend dor. He lä de Bibel ut de Hand, nöhm den Pinsel un füng an to maolen. So uk de Karken van Auvers, de dör üm berühmt worn is.

Man in de lessden Maonde van sien Leven köm de Fraog naa Gott doch noch eis weer. Schients was he dor wull noch nich mit fardig. Dor vertellt villicht uk de Wege van, de he lünker un rechter Siete üm de Karken ümto maolt heff. Wor geiht dat nato? Un dor geiht en Menske üm de Karken ümto. Söch se de Döörn? Will se dor villicht ringaohn?

So as Vincent van Gogh, so fallt dat vandaoge uk veele Lüüe schwor, to glöven. Se hebbt villichte uk wat belevet, wor se sik segget: Dor will ik nicks mehr van wäten. Man dat Leven gaiht wieder... Un manges kummp dat Thema doch noch eis weer. Is dann good to wäten, dat dor en Weg is. Un dat de Döörn aopen steiht. Un van binnen löchtet dat Leven van buten dör de Fensters, uk wenn 't van buten faoken bloß schients gries utsüht.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


3.6.2018


na baven