Dat kannst mi glööven!
Maitied un Maiandachten

vun Heinrich Siefer

To'n Anhören hier klicken:
Lesen deit Heinrich Siefer.

In de Maitied denk wi in de kathoolschen Karken wat mehr as anns an Maria, Jesu Mudder. Lüüe kaommt bi'nanner, singt un bäet to Ehren van Maria. Man disse Bruuk is noch gor nich so olt. De allereierste Maiandacht geev dat 1784 in Ferrara, in Italien. Van dor güng et dormit dann buld in alle Welt. De eierste Andacht in Düütschland gev dat 1841 in 't Kloster van 'n gooden Harder in de Gägend van München. Achternaoh dann meist överall in Düütschland. In Karkens un de lüttken Kapellen up 'n Dörpe wüdd Mai to 'ne Maiandacht inlaodet. Väle Stäen is dat uk vandaoge noch so.

Mangesein'n heff sik villicht woll all maol fraogt, of de Katholiken dat nich 'n bäten överdrieven daut mit Maria. Wisse, in de Bibel un in de Geschichtsbäuker wedd wi över Maria nich väle gewaohr. Un doch heff Maria väl Spooren achterlaoten, meist düüdelker as mangesein grooten Herrscher. Ehre Geschichte fang so an: Se is eine, de tolustert. Se levet nich bloß för sik allennig in ehr eigen Welt, wor een sik faoken bloß üm sik sülvest dreihet. Se is waok, ehr Ohr, ehr Hart is nich verschlaoten. Undat is wisse ehr Geheimnis: Se verschlutt sik Gott nich. Un so wedd se üm künnig, as he dör den Engel Gabriel to ehr prooten deit.

Dat versteiht sik nich van sülvest. Un eenfach is dat uk nich. Denn Gott kummt dor nich mit 'n groot Puhei her. Gott prootet liese. Un Gott prootet meistieds dör annere, faoken heil anners, as Mensken dat verwachtet. De meisten Mensken hört faoken bloß sik sülvest schnacken. Man Maria krigg Gottes Stömme in de Künne. Toeierste kann se dat uk bold nich glöven. Se verfehrt sik. Dat Gott ehr so neehge kummt, bring ehr heilmaols dör'nanner. Man se lustert to, schwigg stille, denkt naoh.

Bloß so kann ein Mensk to 'n Gloven kaomen. Gloven, dat mennt ja nich, aals blind hennehmen, anner Lüüe dat Denken överlaoten. Maria lustert to un denkt naoh. So kummt se to'n Gloven, mit ehr Harte un mit ehrn Verstand. Un so kann se to'n Vörbild vör väle weern, as Süster in 'n Gloven.

Bi us up plattpartu.de finnt man nu utsöchte Bidräge van disse Radiosendung.