Dat kannst mi glööven!
Steernstunnen

vun Heinrich Siefer

To'n Anhören hier klicken:
Lesen deit Heinrich Siefer.

Momo — so hett een Bauk van den Schrieversmann Michael Ende. In de Geschichte luurt griese Kerlse de Mensken för Geld Levenstied off. Man Momo, een lütt krägel Wicht, un een poor Frönne, de laatet sik nich so licht för'n Griesen hollen. Mit Hülpe van de Schilkröte Kassiopeia un Mester Hora schafft se 't, de Welt vör de griesen Kerlse to redden.

Mester Hora kennt sik ut mit de Tied, besünners mit Steernstunnen. He heff en Steernstunnenklock, fein mit Demanten an 'n Käen in sien Westentask. "De Klock wieset aal de Steernstunnen an, de ein Mensk in sien Leven hebben wedd", vertellt he. "Un züh —, jüst wor wi nu schnacket, is dor weer so een Steernstunne anfangen."
"Wat is 'n Steernstunne?", fraagt Momo.
"In jedeen Menskenleven giv dat heil besünner Tieden. Dann is 't so, as wenn aals in de Welt bit henboven naa de Steerns so fein tosaamewarken deit, dat wat passeern kann, wat anners seläve nich weer mögelk is — vörher nich, uk nich löter. Is bloß spietelk, dat de Mensken so 'ne Steernstunne faaken nich mitkrieget. So geiht dor so manges en Steernstunne so drock as se kaamen is, weer vörbi."

So as Momo fraagt sik wisse nu de een of anner, wat dat för Stunnen sünd, wor wat Grootes passeiern kann. Un wo krigg een dat mit? Manges villicht jüst dorüm nich mit, üm dat wi glövet, dat dat wat besünners Gewaltiget wäsen mott. Un wi töövt un töövt, ... un nicks passseert. Dat Groote is faaken noog jüst nich dat Gewaltige.
Een Steernstunne kann wäsen: Een leven Beseuk naa en Dag, wor aals nich so recht loopen is. En Schnack up de Straat mit 'n Nahber, den 't up Stäe nich so good geiht, för den ik mi Tied nehme.

Sowat as 'n Upblinkern van Steernstunne sünd för mi aaltied uk de Karken- un Katholikendaoge. So as nu jüst de Katholikendag in Mönster. "Söök Fräden!" lutt dat Motto. Lüüe kaomt binanner un belevet, dor maokt nich een en Verscheel d'rtüsken, wor een herkummt, wat för 'n Klöör sien Huut heff, off een nu evangelsk, off kathoolsk is, of villicht bloß neiwennig. Mitnanner singen, bäen un diskereern in lüttke of groote Koppels lätt Lüüe beleven: Wi sünd up Eern een groote Menskenfamilge, hört tosaame. Uk en Steernstunne. So fang Fräden an! Un nicks heff up Stäe use Welt nödiger!

Bi us up plattpartu.de finnt man nu utsöchte Bidräge van disse Radiosendung.