Dat kannst mi glööven!
Typisch!?

vun Heinrich Siefer


To'n Anhören hier klicken:
Lesen deit Heinrich Siefer.


Vullpackt mit Tutens kummp se mit ehrn dicken Wintermantel in de Gaststuuv. "Heff sik vandaage richtig lohnt, in 'ne Stadt to feuhern!", denkt sei tofräe bi sik. "Bi all de rünnersettden Saaken hebb ik bor Geld sport. Nu sitt dor uk woll noch 'ne örnlicke warme Zoppen anne."

Se söch sik 'n freien Platz. Stellt ehre Taskens off. Treckt den Mantel ut un hang 'n över 'n Stohl. Dann an de Theke. Dor kann man sik wat ton Äten utsööken. Mit 'n Teller heite Zoppen kummp se weer an 'n Disk trügge. Stellt den Teller of un markt, dat se vergeeten heff, een Läpel mitonähmen. Trügge an de Theke.

As se nu mit 'n Läpel inne Hand un den moien Rööke van ehre Zoppen in 'ne Näsen trügge kummp, glövet se nich, wat se dor süht: Een Frömden, een Utlänner sitt dor kommodig vör ehren Teller un läpelt ehre Zoppen in sik rin. "Sünd doch aale gliek. Typisch!", denkt se. "Wat fallt den in? Man nu tööv! Di will ik helpen!"

Füünsch un mit grelle Oogen settet se sik den Kerl gegenöver daal un ätt mit ehren Läpel, so as he uk, ut den glieken Teller. Beide segget nich een Wort. Bloß of un to kann man dat Klappern van Läpels an 'n Teller mit de Höhnerzoppen hörn.

Naa 'n Tied hebbt de beiden stillkens mitnanner de Zoppen uppe. Aals schier. Dann steiht de frömde Kerl up. Man nee, he löpp nich weg, so as dat Froomensk all denket. Nee, he geiht naa de Theke röver un bring twee Dopp Koffe mit. Stellt een Dopp vör de Froo daal, drinket sienen gau ut, wünscht noch een moien Dag un geiht sienen Weg.

Wat verlegen bedankt sik de Froo, de nich so recht weet, wat se van dat heile Warks nu hollen schöll. De Saake kummp ehr bannig seltsam vör. Un glieks schütt ehr 't dör 'n Koppe: "Miene Taskens! Weg sünd se. Hebb ik 't nich forts wüsst? Typisch Utlänner!" Se spring up un will vör Brass un Iewer all achter den Kerl her. Doch jüst as se loss will, süht sei twee Diske wieder ehrn Wintermantel övern Stohl hangen, un up 'n Bodden kegen den Stohl ehre Inkoopstutens. Un up den Disk steiht uk noch ein Teller Höhnerzoppen. De is mittlerwiel over all kold worn.

Typisch…!?!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


5.5.2019


na baven