Dei Stiern von Bethlehem

vun Behrend Böckmann

So heit dat bi Matthäus in't tweite Kapiddel inne Versen 1-9:

As nu Jesus in Bethlehem in dat Land Judäa bi König Herodes sien Tieden burn wier, dor keemen stiernkunnig Manns ut'n Morgenland nå Jerusalem un frögen: "Wur is dei Juden ehr niegeburn König? Wi hemm' nämlich sienen Stiern in't Morgenland seihn un sünd nu kåmen un willen em dei Ihr erwiesen." Un as dei König Herodes dit tau hürn kreech, dor verfihrt hei sik un all Lüd in Jerusalem mit em. Un hei reep alle Hogenpreisters un Schriftgelihrten ut dat Judenvolk tausåmen un wür's frågen, wur denn dei Heiland up'e Welt kåmen süll. Dei säden tau em: "In Bethlehem, dat in'n Land Judäa liggen deit. Bi den Propheten steiht nämlich dit schräben: 'Un du, Bethlehem, büst dei Lüttst ünner dei Herrschaften in't Judenland un ut di ward 'n Herrscher kåmen, dei œwer mien Volk Israel dei König sien sall.'" Dunn reep Herodes dei Stiernkunnigen heimlicherwies tau sik un wull von ehr weiten, tau wecker Tiet dei Stiern upkåmen wier. Un denn hett hei sei nå Bethlehem schickt un säd: "Reist nu hen, üm allens œwer dat Kind ruttaukriegen. Un hefft ji dat Kind funnen, denn låt mi dat weiten, dormit ik ok hengåhn un em dei Ihr erwiesen kann." As sei nu mit den König snackt harrn, reisten sei los, un süh, dei Stiern, den s' in't Morgenland all seihn harrn, güng vör ehr up, bet sei dorhen keemen, wo dat Kind wier. Dor stünn hei still œwer dat Hus, sei freugten sik, güngen rin un fünnen dat Kind mit sien Mudder Maria.

So wiet dei biblisch Geschicht. Un siet disse Tiet hemm' Stiernenkieker un Stiernendüder versöcht, ut dei Stellung vonne Stierns taueinanner dat sonnerbore Lüchten von den Stiern von Bethlehem an'n Stiernenhäben tau erkunnen un so ok dei Geburt von Jesus tau bestimmen. Pythagoras (570 - 501 vör dei Tiet) harr in sien Lihr all von Kometen språken, also von Stierns, dei so as dei Stiern von Bethlehem lüchten dän. Un so kann dat angåhn, dat dei Evangelist dat Lüchten von'n Kometen mit 'n Ereignis von Weltbedüdung in Verbinnung bröcht hett.

Histoorsche Kometenerscheinung, 16. Jh.

Un ümmer wedder geef dei Stiernenhäben Rådels up un klauke Lüüd wullen rutkriegen, dat 'n Komet ümmer denn lüchten däd, wenn 'n niege Tiet för dei Minschheit anfüng, sik unvermaudens ein Königriek billen wür orrer ein König up'e Welt keem. Un so hett 'n ok nich aflåten, dei Geburt von Jesus, den Heiland un Judenkönig, mit dat Lüchten von den Stiern œwer Bethlehem tau verbinnen. Un so hemm' dei Stiernkunnigen rutfunnen, dat dat son'n Kometenlüchten in't Johr 12 un 11 v.J.C., nich œwer tau dat annåhmen Geburtsjohr geef.

In't Middelöller hett Johann Kepler (1571 - 1630) sik dormit befåt, woans dei Planeten, as sei vun dei Ierd ut to seihn sünd, upeinanner dräpen kœnen un dordörch dat utsüht, as wenn sik 'n nieger Stiern billen un heller as dei annern lüchten deit. Nå disse Verklorungen von Kepler keem man nu up den Infall, dat sik in't Johr 6 orrer 7 nå dei Tieträknung dörch dei Begägnung von Jupiter, Saturn un Mars schienbor ein nieger Stiern — äben dei hütig Stiern von Bethlehem — billt hett. Un dormit dat mit Jesus sien annåhmen Geburtsjohr œwereinkümmt, wür disse dreifache Begägnung von Jupiter, Saturn un Mars in't Johr 5 orrer 4 vör dei Tiet lecht.

Un ok as dei Stiernenkieker ümmer kläuker würn, geef dei Stiern von Bethlehem kein Rauh. Ümmer wedder wür nie rutfunnen, wennihr Stierns sik so begägent sünd, dat dat tau dat Kometenlüchten keem, as dat von Matthäus fasthollen wür. Un bet hüt is nich wiss, ob würklich in't Johr Null dei Stiern von Bethlehem so lücht hett, dat dei Stiernkunnigen ut't Morgenland dat Jesuskind in dei Krüff in'n Stall finnen künnen. Hüüt hürt dei Stiern von Bethlehem äbenso as dei Dannenbom tau Wihnachten. Un so gifft dat taun Bispill dissen Stiern taun Lüchten för binnen un buten, ut Päperkauken un Schokelor, as Glasschmuck för den Dannenbom un anmålt Holt œwer den Stall inne Wihnachtsdekoratschon. Hei is ok nich mihr wechtaudenken, wat dat Geschäft tau Wihnachten angeiht.

Wenn sik dei Stiern nu nich anners verkloorn lett, blifft bloots noch ein Wunner œwer. Dei Wunner muttst ja nich verkloorn, dei dröffst glöven.