Foto: Wikimedia Commons, Stefan Kühn

De erste Schief Swattbroot

Gedanken na en Fastenkur vun Silke Frakstein

Een scheunet, grotet, richtiget Swattbroot liggt vör mi. Ut enen lütten Bäckerloden. Natur pur. Keen Sirup binnen, de Farv ist echt.

Eene Week mutt dat liggen, dennso hett dat "Charakter".

Jedeen Dag snack ik nu mit dat Swattbroot un rück dor ok an. Hmmmmmmm, wat'n Duft. In Gedanken smeer ik mi Botter, Smolt un Mettwust op.

Ik heff mi vörnohmen, de erste Schief gifft dat to'n Abendbrot, mit'n lüttes Glas Beer. Noch knabber ik Knäckebrot mit Hüttenkäs. Ik mutt de Ogen dorbi dicht moken, denn de Hüttenkäs süht meist so ut, as harr ik em al mol eten. Ik deck em also mit Gurke un Tomate to. Rohkost hett wat. De Schuuvlood vun't Köhlschapp is bit bobenhen vull mit Kaninkenfudder.

Hirsepüfferchen mit Quark un Kantüffeln gifft dat to Middag. Ober lot man, Honnig, un nochmol Honnig, jümmers un överall.

Mi geiht dat good. Ik sitt, mit'n Tass Tee inne Hand, neben dat Kokenbuffet in't Café, wo de Torten so dick un groot sünd, as harrn wi noch slechte Tieden, un dat lett mi koolt, ganz koolt. Ne würklich, dat stimmt.

Bün dat würklich ik? Teihn Dog: Tee, Tee, Tee un nochmol Tee. To Middag un Obenbrot 'n feine Gemüsesupp. In de mehr Ogen rin- as rutkieken. Swemmen, Lopen, Sauna, Yoga un teihn Stünn slopen. Jungedi, de hebbt mi op'n Kopp stellt.
Ik heff mi sülvst nich wedder kennt. Een ganz niegen Menschen hebbt se ut mi mookt. Wenn ik ok in de ersten Dog dacht heff: "Nienich in't Leven höllst du dat dörch, Silke."

Foto: Wikimedia Commons, Rainer Renz

Un nu, nu sitt ik hier un snack mit dat Swattbroot. Sinnig, vull Andacht snied ik de erste Schief af, probeer de lütten Krümel un Stück för Stück ward de Schief lütter. Ik denk 50 Johr trüch: Swattbroot, boben op de dicke Huut vun de Melk mit Zimt un Zucker. Dat Paradies.

So'n Genuß in de hütige Tiet? Mit Kaviar, Lachs un Bärenschinken?

Teihn Dog Heilfasten un achterno Aufbautage! Die Welt wird schöner mit jedem Tag…