Dat kannst mi glööven!
Ein Dack üöwern Kopp

vun Wilfried Theising, Vechta

To'n Anhören hier klicken:

Lesen deit Wilfried Theising.

Lesten Hiärfst droff ick een nieet Hus för Männer inwiehen, de kiene Wuohnung hebbt. För eenige Wiäken küönnt se doa bliewen, bess se ne faste Wuohnung hebbt.
In düsse Tieden is dat nich licht, ne Wuohnung to finden, de in Schuss is un nich to vull kostet. En Dack üöwern Kopp is vull wärt.

De Adventstied wiest us, dat usse Här Jesus auk en Dack üöwern Kopp sochte. Maria, de in Ümstennen was, un Josef brukten eenen warmen Plass, woa dat Kind up de Wiält kuommen konn.

De Hillige Familie op de Flucht. Bild vun Eugène Girardet

Wi alle wiet, wu dat afflaupen is. De beeden hebbt sick de Hacken afflaupen. Patt keeneene wull se in 't Hus loaten. Wann du nix in de Taschk häs, dann kümps du nich wiet. Dat was doamoals sau, un dat is auk van Dage noch sau. Well nich betalen kann, de kriggt kien Dack üöwern Kopp.

In de Adventstied wätt wecken Stäen faken en Beld van Maria un Josef van Hus to Hus bracht. Wi nömt dat Herbergssuche. Wi stellt us vör, Maria un Josef wassen van Dage unnerweggs un kloppten bi us an de Dör.

En Beld in't Hus to loaten, is nich schwoar. Owwer Lüe in dat Hus to niähmen, dat is heil wat anners. Maria un Josef mossen tolest in eenen Stall. Mär wull man ähr nich gieven.

To us sind in de lesten Jaohren tohaupe Mensken kuommen, well auk en Dack üöwern Kopp sökten. In ähr Land wassen se nich mär sicher wiägen Krieg un graute Naut för Lief un Siäl. In usse Land hebbt vull Lüe holpen, dat se alle en Dack üöwern Kopp kriägen.

Flucht in uns Daag. Bild ut Wikimedia Commons

Usse Här Jesus häff eenmoal seggt: Watt Ih för eenen van düsse kleenen doan hebbt, dat hebbt Ih mie doan. (Mt 25,40) Wann een Mensk bi us an'ne Dör kloppt, dann is dat so, äs wann He sölfst vör us vör de Dör steiht. Doamoals, äs Maria un Josef an de Dören kloppten, hebbt de Mensken nich wieten, well se affwiesen hebbt. De Här sölfst bleef buten stoahn. Kann dat van Dage auk passeern?

Bi us up plattpartu.de finnt man nu utsöchte Bidräge van disse Radiosendung.