Dat kannst mi glööven!
Nikolaus kummt

vun Wilfried Theising, Vechta

To'n Anhören hier klicken:

Lesen deit Wilfried Theising.

Van Dage freit sick alle Kinner. De Nikolaus kümp. Un he kümp nich met lüörige Handen. He brengt leckere Saken met. Vör Joahren, äs ick Kaploan wör, ha wie en Problem in de Schole. De Nikolaus konn nich kuommen. He ha wuoll to vull Termine annuommen. He sall ja auk üöverall henkuommen, de arme Kiärl.
Pastor segg to mi: Kaploan, du moss dat maken. De Kinner freit sick so up den Nikolaus.

Ruck zuck brachten de mi ut eenen Kinnergoarden en Nikolauskostüm un watt so alle doabi hört. Wichtig wass den langen witten Board, damett de Kinner mi nich erkennen kunnen. Dann göng ick mett en dick Book in de Klasse. Met deipe Stemme dö ick de Kinner begröten. Dat mog Indruck. Ik har noch nich veel seggt, do reip mien Naoberjungen Jan: Dat is nich de Nikolaus. Dat is de Kaploan.

Verflixt, hebb ick dacht, noa kanns inpacken. Ett wass mucksmüskenstill in de Klasse. Gott Dank kammen mi de annern Kinner to Hölpe: Jan, schwieg still. Dat is doch de Nikolaus. He heff us watt mettbracht. Jan wör still un sagg kien Wort mär. Patt he keck immer noch luorig un wull't so recht nich glöwen, dat ick de Nikolaus wass. Owwer ick kunn de Kinner beschenken un alle freiden sick.

Wat ik dor belevet hebbe, kennt wisse uk de ein of anner Nikolaus van sienen Dennst. Man ett is doch jedes Joahr ne Freide, de Kleenen un manges auk de Grauten to seihn, wann se de Gaven van de Nikolaus in ähre Handen hollt.

St. Nikolaus. Russ'sche Ikone

Doabi is dat Schenken un Sick-beschenken-Loaten van dage nich immer eenfack. Faken meent wi, ick mott watt trügge gäven, wann mi watt schenkt wett. Ick kann nix anniähmen, wann ick nix trügge gäv.

Doch watt de Nikolaus us biebrengt, is nich trügge gäven. Ett is deelen. Wi könnt siene Gaven anniähmmen. He will nix van us trügge hebben. Owwer he freit sick, wann wi deelt. Dat is watt anners äs trügge gäven. Well trügge giv, de will viellicht nich danke seggen mötten. Doabi is dat so enfack. Ett is kinnerlicht.
Äs ick noameddags noa Hus hen kamm, stönn mien Naoberjung Jan vör de Döör un segg bloß "Danke, Kaploan!".

Bi us up plattpartu.de finnt man nu utsöchte Bidräge van disse Radiosendung.