Wiehnachts-Bottschap 2002

En lichtföhlig Apparaat mellt: De Dag is to Enn, bi lütten warrt dat düster. Överall blucken de Stratenlampen up. Koles Neonlicht sorgt dorvör, dat jeedeen Eck utlücht warrt. Nich blots in Lübecks Straaten, sülfstverständlich ok bi uns in Stockelsdörp un Swartau. Un in Cashagen un Curau is dat nu ok so, wieldat de ‘ne Dörp-“Erneuerung“ kregen hebbt. Noch heller bieten di de Schienwerfers vun de Autos in de Ogen. De grooten Wagens vun BMW un Audi sünd de legsten.

Un in un an de Hüüs warrt dat hell, Bewegens-Meller knipsen de Strahlers an, wenn du in de Neeg kümmst. Warrt Dag mitten in de Nacht. Alle Lüchten von Lübeck, Stockelsdörp, Cashagen un Curau tosamen strahlen de Wulken an, hell Lichten-Lüchten över Städte un Dörper.

Stierns wullt du seihn, de Melkstraat ok noch? Is nich, warrt nich mihr Nacht, wo wi hüdigendaags togang sünd.

Up liese Sahlen kümmt de Nacht, heit dat in eenen Riemel. Liese Sahlen?

De Eer bi Nacht. Foto: Satellitenopnahmen/Nasa
De Eer bi Nacht. Foto: Satellitenopnahmen/Nasa

Up de Bundesautobahn brummt, summt un knattert dat: Dat Gebruus warrt wiet in‘t Land dragen. De Lohstraat kümmt ok nich to Rooh, jümmerto sünd Lüüd mit ehr Schesen ünnerwegens. Dortwischen dat Getuut vun de „Stadtmusik", de Reddungswagens un de Nootdokters. Tuten un blages Blitzen! Jümmer fakener kreisen de grooten Jumbos över uns Dörp, ehrer se in Fuhlsbüttel orrer in Blankensee daalgahn. An ludsten is „Christopher", de ut de Luft kamende Reddungs-„Hubschrauber".

Dreeduppelte Finsterschieven hebbt wi insett, dat all de Larm buten blifft. Un binnen röhrt dat Telewischen or de Hei-Fi-Kassen mit 100 Watt. —

— Un jüst in disse Tied is liesing een heel wichtige Bott ünnerwegen, en Bott vun baben ut‘n Heven. Blots se kümmt ünnen nich an bi all den Larm, den wi produzeert.

Fleegtüüch

Nu kunn uns Vadder in‘n Heven doch Dunner un Blitzen insetten, dat uns Hörn un Seihn vergüng, wenn he uns wat vermellen wull.

Dat stell di mal vör: Midden in‘n Winter keem een Orkaan, blaag-wittes Lüchten suste vun een Eck vun Heven na de annere. De Minschen-Lüchten weern tranige Funzeln, dat Auto-Gebrumm liesing Müggen-Sirren. Un mitten rin in dat Tosen wöör uns Vadder mit een Lüchtschrifft vun Noord na Süüd in de Wulken schrieven: „Keen Angst nich, ne, ja keen Ängsten nich!“ Un mit een överirdsches Megaphoon tönte he luder as dat Dunnern: „Een groote Freud will ik juch verkünnen. Freden schall sien hier neern up Eerdn.“

Vun de Wöör wöörn de Hüüs wackeln un beven. Dat weer doch denn wat: Wiehnachts-Bott för uns niemoodsche Tieden. De kunn keeneen överhören. ——

Wat‘s denn los mit unsen Vadder Gott, kann he nich orrer will he nich? Oldmoodsch is he un blifft he: Herders up de Feller vun Bethlehem kregen de Naricht vun de frohe Bottschafft mitten in een kole, regennatte Nacht. Un dat is nu üm un bi tweidusend Johr her. Dat is bi besten Willen keen Top-Naricht för de „Tagesschau“.

Veel mihr Minschen drieven hier in un üm Lübeck ehr Weeswark as domaals in dat vun Kriegen daalliggende Bethlehem. Tohörer harr he naug!

Singapur

Goot weer Vadder Gott beraden, mienen Vörslag to folgen un dat noch malins mit Dunner, Blitzen un Megaphoon to versöken. Sien “Public-Relations-Berader“ schullen ehm dringlich toraden. Dat weer denn endlich een Wies, de wi niemoodschen Minschen verstahn wöörn.

Avers as ik ehm kenn, blifft he bi Maria un Joseph, bi Bethlehem,
de Herders up de Feller un den lüchtenden Stiern över den Stall.
Denn so bruukt he sik nich to wunnern, dat Karstadt,
de Media-Markt un Douglas ok dit mal wedder de
Winner sünd. Brinkmann un Haerder gifft dat ja nich mehr.

Orrer wat meinst Du?

De Floten in Elv un anner Strööm,
de Dröögde un den Hunger,
de wild üm sik scheiten Minschen,
uns vergifft Nohrenkraam!
Teiken vun Vadder Gott, sien Bott nu endlich to hören!

Du tühnst ja!

Wat hett de Hillig Nacht dormit to doon?

Licht


Rudi Witzke

8.12.2002


na baven