Dat kannst mi glööven!
Lüttke Naohricht — groote Erfaohrung

vun Pfarrer Heiner Zumdohme, Damme


To'n Anhören hier klicken:


Lesen deit Heiner Zumdohme.


Lessdens lees ik inne Zeitung eene lüttke Naohricht, nix grootet, villichte 30 Riegen. Kiene Weltpolitik, uk kiene Naohricht öwer eene groote Katastrophe in use Welt.

Buntet Holland! — So was de Naohricht ut use Naohberland äöerschräwen. Dree hollandsche Museen harn de Lüe in ähr Land uproopen, maol nipp un nau uptauschriewen, wat se an eenen ganz normaolen Dach daon, lustert, seihn un beläwet harn. 40000 Lüe harn dann uk mitmaokt. Man wat schull dat?

Ganz eenfach: Taukaomen Generationen schulln sik laöter een Bild daorvan maoken kaönnen, waor dat wükliche Läwen van van Daoge utsüht. Een interessant Unnernähmen. Mi heff noch nie nich eener seggt, ik schull maol upschrieven, wat ik dänn ganzen Dach so maoke. Nu bün ik kien Holländer, man ik hebbe trotzdem mitmaokt — nich för taukünftige Generationen, bloß för mi, uk daorümme, weil ik jeden Aowend, ehrder ick inschlaope, Gott dänn Dach henhaole un noch maol trügge kieke up dat, wat ik beläwt, sächt, daon oder nich daon un lustert häbb. Twee Sieten hebb ik schräven. Protokoll van eenen ganz normalen Arbeitsdach! Van't Upstaohn bit taun Schlaopengaohn!

Daor wör nix Weltbewägendes passeert. Ik wör taueierste uk bange, of ik woll dat Blatt öwerhaupt tau de Hälfte vull krech! Man dat wör ganz lichte un güng heller drokke! Un as ik fardich wör un läsen dö, wekke Indrücke mi van dissen Dach in Erinnerung blewen, verschrök ik mi doch een bittken. Daor stünd nämlik väl tau väl Leipes. Daor har ik mi öwer dän argt, weil he tau laote köm, un öwer dän annern, weil hee krank wör un ik üm ünnerstellde, dat he gaor nich krank wör un bloß blaw maoken dö, aohne dat genawe tau wäten.

Un ik lees bolde nix daoröwer, dat ik mi uk frait har, taun Bispiel öwer de Sünne oder dat fründlike Greuten van miene Kösterschke. Un daor wör uk nix van tau läsen, dat ik annere eene Fraide maokt har.

Gaut, dat ik mitmaokt hebbe, anners har ik an'n nächsden Dach villichte wär jüs so läwet as gistern un van Daoge, aohne dat Moje van dän Olldach tau seihn un aohne dän Fründ, dän Naohber, dän Kollegen 'ne lüttke Fraide tau maoken!

Ik glöwe, wi versümt wat, wenn wi us nich af un tau uk dän Spägel vörhaolt, wat wi än ganzen Dach so maokt hebbt. Mi heff dat holpen un uk de Lüe, mit de ik wat tau daun hebbe.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


11.12.2016


na baven