Dat kannst mi glööven!
Dat Öller

vun Heiner Zumdohme

To'n Anhören hier klicken:

Lesen deit Heiner Zumdohme.

Ick sitt inne Baohn. Ein paor Stäuhle wieder sitt ein Fraumenschk. Sei schnackt mit ein Wicht. Ick hör, wo sei äöwer ehre Mauder an 't Schellen is. "Stell di vör, nu fang sei Johre naoh'n Dood van usen Vaoder noch einen neien Kerl wer an tau freien. Will noch maol ganz van vörne anfangen!" Un dann luster ick noch, wo sei dorbi, "un dat in ehr biblischet Öller!" Dor mössde ick dann doch sinnig lachen. Denn inne Bibel werd us immer wer van Lüe vertellt, dei uck in 't hooge Öller van Gott roopen werd un ganz nei wer anfangen schöllt. Abraham taun Bispill was 75 Jahr old, as hei siene Heimat verlaoten un in ein frömdet Land trekken schall, dat Gott üm wiesen will.
Ick kann mi vörstellen, dat Abraham dat nich lichte fallen is. Mit 75, dor knipp un treckt di dat wisse maol hier un dor all wat. Har Gott sick nich ein anneren utseuken kunnt? Einen jüngern? Worümme jüst üm?

Ick glöwe, dor will Gott us wat mit vertelln! Villichte tau erste dat: Olle Lüe sünd in use Gesellschkupp, dei faoken blots noch dat Junge un Moje süht, noch lange nich dorbi öwer. Wi bruukt olle Lüe, dei wätet, wat sei kaönt un wat sei nich sünd. Dei wätet, worup dat ankummp.

Ein tweidet: Wenn du mennst, dien Läwen is vörbi, dor giff dat nicks mehr tau haolen, tau väl is all versümt, tau väl verkehrt loopen, dann wunner di nich: För Gott is dat noch lange nich vörbi. Hei häff uck dor noch Möglichkeiten, wor wi meent, aals is ümsüß wän. Räk mit üm, uck in't Öller!

Ein lessdet, wat mi dei Geschichte mit Abraham sägg: Wenn man öller werd, dann werd man manges uck laier! Taun Bispill use Karken: Dei is uck all heller old. Un an masse Stäen häff sei sick inrichtet. Aals schall so bliewen, as dat is, nicks draff sick ännern. In väle Soaken is use Karken uck lai worn. Un ehr gaiht dat faoken nich anners as mi.

Je öller ick wer, ümso dröcker richte ick mi in. Mien Huus, mien Waogen, mien Gorn! Un dann fallt dat heller schwor, maol wat Neies tau waogen un sick wer up'n Patt tau maoken. Gott legg mi mit Abraham an't Harte: Bliew seläwe nich staohn. Waog dat, uck in't Öller maol rut tau gaohn, rut ut dienen Olldach. Woag maol ein paor Träe in't frömde Land un verseuk di an neie Upgaowen. Dor teuwt villichte noch wecke up di! Du traust di dat nich tau? Du moss dat ja nich alleinig maoken! Gott giff Abraham sienen Sägen för den neien Wäg. Hei giff üm uck di.

Bi us up plattpartu.de finnt man nu utsöchte Bidräge van disse Radiosendung.