Dat kannst mi glööven!
You will never walk alone

vun Heiner Zumdohme

To'n Anhören hier klicken:
Lesen deit Heiner Zumdohme.

Siet gistern is de Fautballweltmeisterschaft taugange. Äöwer veier Wäken is se nu so 'n neie Aort "Religion". Man dat is de Fautball uk all aohne Weltmeisterschaft. Denn wi mött taugäwen: use Karkens wärt immer losser un de Fautballstadien wärt immer vuller. Bi'n Fautball wärt Faohnen schwungen, jüs so wi bi eene Fronlichnamsprozession. Dor wärt Lieder sungen as Choräöle inne Karken bi de Misse. Taun Bispill: You'll never walk alone, up Plattdüütsch: Nie nich büst du allennig unnerwegens!! Dat kunn man uk inne Karken bi de Misse singen. Masse Vereine hebbt dit Lied as ähre Hymne: Borussia Dortmund, Borussia Mönchengladbach, uk de VFL Osnabrück. Wenn dat Lied sungen wärt, dann spöört man in 't Stadion eene besünnere Andacht un Treue van de Fans tau ähren Verein: Wi gäft för jau aals! Gi wärt seläwe nich alleene gaohn. Wi staoht achter jau!

Vele Fans sünd mit ehr Harten dorbi — mitünner ok mit twee

Daor schinnt aower uk för mi as Christ wat up un wat Glowe för mi bedüen kann. Treue. Ik staoh tau Jesus Christus, hee is för mi de Wäch, de Waorheit un dat Läwen. Ik trau üm, ik verlaot mi up üm. Maok mien Läwen an üm faste, jüs gliek, wat up mi taukummp.

De Fraoge bliff: Waortau dat aals? Waorümme sik as Fautballfan an eenen Verein binnen un as Christ an Jesus Christus? Fraog een Fautballfan dornao. De wedd di woll vertellen käönen, wat he mit sienen Verein belevet heff; man wat de Taukunft bringen wedd, dor kann he di nicks äöwer seggen.

Un wo is dat mit de Fans van Jesus? Wärt de ganze Maihte, de sik maokt hebbt, belohnt?

Eens staiht faste: För de Fans van Jesus springt dor nix bi rut, wat naossen up een Bankkonto inbetaohlt wärn kunnde. Man Jesus säch siene Fans wat tau, wat för mi masse mehr weert is as aals Geld uppe disse Ärn: Wenn gi tau mi staoht un bi mi bliewt, dann schöllt gi dat ewige Läwen hebben. Uk in 'n Dood laot ik di nie nich allennig. Dann stoah ik tau di!

Jesus ünner sien Fans

Ik gäf tau, dat is wüklich grötter, as dat man dat mit 'n Verstand begriepen kann, aower doch ein Läwensziel, worför et sik lohnt tau läwen.

Dat is de Ünnerscheed tüschken de Fautballreligion un de christlicke Religion: De christlicke Religion heff Taukunft, de usen Verstand aöwerdröp.

Bi us up plattpartu.de finnt man nu utsöchte Bidräge van disse Radiosendung.