Dei Hås inne Predulch

vun Behrend Böckmann

Dei Hås is in dat Öller kåmen,
wo hei nich mihr so beinig is;
hei hett 'n Trendmobil sik nåhmen
un is sik so sien Såk nu wiss,
dat hei kann noch väle Johren
üm dei Tiet von't Osterfest
up disse Oort dei Eier fohren
in so männig Osternest.

Dei Korf vörn an dat Rull-Mobil
verschafft den Hås ein lichtet Spiel!

Man leech geiht nu dat Wöddelngnågen,
dor dull dei Tähn afschläpen sünd,
sien Håsendokter secht siet Dågen:
"Vörbi dei Tiet, as du wierst Kind;
drüdde Tähn låt di man måken
as Implantat von't Allerbest,
denn gnåchst du wedder alle Såken
sorgenfrie an't Osterfest."

Dor ok sien Ogen hemm' nålåten,
brukt nödig hei dei Håsenbrill,
üm dei richtig Farf tau fåten,
wenn hei Eier anmålen will.
Ok Druppen sall't för Hasen gäben,
dei dat ok för Minschen gifft,
sei låten em denn ewig läben
un hei uns so erhollen blifft.

Einfarwig is, wat hei noch kann,
man dor mutt hei ok ganz nah ran!

As hei nu is bi't Eierkåken,
œwerkümmt em disse Plåch:
Vegane Eier sall hei måken,
dat licht em düchtig up'n Måch.
Nu möt hei Lieweranten finnen
un klingelt an bi Firma Lindt
un ordert, åhn sik tau Besinnen,
Eier för't vegane Kind.

Vegane Eier wasst nich so...
Schaad! Sünst wier uns Hås recht froh!

So deit hei jeden Wunsch erfüllen
wiederhen so Johr för Johr,
deit ok veganet Janken stillen,
is för alle Minschen dor.
Hei kann sien Trendmobil belåden
un hüppt vergnäuglich achteran;
so kümmt uns Hås nie nich tau Schåden
un ewig Eier bringen kann.