Modder Sünn ehr Kinner:
De Mååndschien

Märken vun Sophie Reinheimer, överdragen vun Klaus-Dieter Tüxen

Op de Strååt is dat düüster. Nüms geiht mehr spazeren. Blots de Mååndschien bummel noch so'n beten ümher.
Hee kiekt sik de Hüüs an un kiekt ok mål in en Stuuv rin. Denn klattert he över'n Goorntuun un geiht in'n Goorn spazeren.

All de Blomen slåpen in, nickt mit seehr lütten Köpp — åvers de Hoffhund Hasso, dee slöppt nich! Hee kümmt ut sien Hunnenhütt sprungen un bellt den Mååndschien an. "Wau, wau, wat söchst du hier in uns'n Goorn? Worüm kümmst du blots 's Nachts? Büst woll een Deev! Wau, wau! Mååk, dat du wiederkümmst!"

De Mååndschien lacht, stråkelt den Hund un seggt: "Ja, ja! Du büst en bråve Keerl un passt goot op Huus un Hoff op. Ik bün åvers keen Deev! Magst mi nich lieden? Ja, ja! Wees man still, ik gåh jå all wieder. Gode Nacht!"