Wennehr is Oostern?

vun Marlou Lessing

Wiehnachten is an'n 24. Dezember. Dat weet wi all. Un dien Bortsdag kennst du ok. Avers kennt du ok dat Datum vun Oostern? Dat is nich ganz unwichtig — een will ja sien Eier rechttiedig fertig hebben! Wennehr mutt een to malen un to basteln anfangen? Op töven, dat de Öllern di dat seggt? Ha! So wied kümmt't noch! Lever kiekst du sülven in den Kalenner.

Stimmt, düt Jahr is Oostern an'n 12. April. Avers neegst Johr al an'n 4. April! Wo kümmt dat? Un woans kann een weten, wennehr Oostern is? De Hasen fragen? Pah! Hest du al mal en Haas fraagt? De seggt nix. De Hasen rückt dormit nich rut, de hollt dicht.

(Villicht weet se dat sülven nich so nau.)

Woans is dat denn nu?

Oostern is een vun de Feste, de keen fast Datum hebbt. Pingsten un Aarndank sünd ok so Feste. Un Sommerferien. Bi Oostern hett dat Datum mit dree Saken to doon:

1. Toeerst mutt dat Lent warrn. Un twoors op de astronoomsche Wies. Du weetst ja, in'n Winter is dat mehrst dunkel, man na Wiehnachten warrt de Daag na un na länger, dat warrt heller. De Lentpunkt orr Frühlingsanfangspunkt is, wenn to'n eersten Mal de Dag (also wenn de Sünn baven is) nau so lang is as de Nacht (wenn de Sünn weg is). Dorna sünd de Daag länger as de Nachten, is Lent! Mehr dorto steiht ok hier.
To'n Glück kennt wi den Lentpunkt ok genau. Dat is jümmers de 20. orr 21. März. De Künn dorvun hebbt de Astronomen un Astronominnen. Dat sünd de kloken Lü, de sik mit de Steerns utkennt, ok mit Maan un Sünn un allens, wat an'n Heven so langsflüggt.

2. Denn töövt wi op'n Vullmaan. Opstunns is de Heven nachts schöön klaar, un du kannst nau sehn, woans de Maan runder un runder warrt. Bald is he vull. — Un wenn Wulken sünd? Keen Bang. Astronom*innen weet al lang vörut, wennehr de Maan vull warrt. Den Maan kannst för vele Johrn in de Tokumst bereken, he maakt keen Sperenzchen.

3. Un denn mutt Sünndag kamen. Dat is dat Eenfachste — den Wekenkalenner köönt wi all allerbest lesen! Un dat is denn endlich de Oostersünndag: de eerste Sünndag na den eersten Vullmaan na Lent-Anfang!

Plattdüütsche Kinner weet dat al lang, wenn se den olen Vers singt:

Ooster-, Oostermaandje,
treck dien lüchten Bahntje!
Büst noch minn, bald büst du vull,
denn weet ik, Oostern kümmt nu wull!

Dat Datum vun Oostern kann also mächtig ünnerscheedlich ween. Wenn glieks na'n 21. März (Lent-Anfang) Vullmaan kümmt un denn glieks en Sünndag is, denn is Oostern villicht al an'n 23. März. Hest du avers Pick un kort vör den 21. März is jüst Vullmaan west, denn muttst 4 Weken töven, bet wedder Vullmaan is. Un wenn du megamäßig Pick hest, is dat denn jüst en Maandag, un de neegste Sünndag is noch 6 Daag later. So landt Oostern af un to heel laat in'n April. Verleden Johr weer dat an'n 21. April. In't Johr 2038 warrt Oostern an'n 25.4. ween. Woher ik dat weet? All de Daten vun düsse Feste, de mit den Maan un de Steerns to doon hebbt, hebbt de Astronom*innen lang utrekent un in't Internet stellt! To'n Bispill hier kannst nakieken.

Oostern kümmt jümmers, Oostern kümmt bestimmt, un de Hasen kriegt dat ok all rechttiedig mit! Bloots de Küken nich

Frohe Oostern!

"Wat? Is al Oostern? Heff ik verpennt?"