Maitied, Deel 4: Mehr Väögels

Texte för Kinner van Hildegard Tölke
— Dat Platt is dei Tungslag van't Oldenburger Münsterland. —


Dei Schwattdraußel

Fru Schwattdraußel


Herr Schwattdraußel, Porträt

Dei Schwattdraußel läwt dat ganze Johr bi us. Dat Männken sütt schwatt ut un häff ein'n gälen Schnaobel mit ein'n gälen Ring üm dat Ooge. Dat Wiewken is bruun.


Kessbeern

Draußeln hüpket aaltied. Sei seukt sick Würmer, Ruupen, Käfers un wenn dei Kessbeern riep sünd, dann mögt sei dei uck gern. Ehr Est baut sei ut Gräss, Moos un Stöckskes. Dat Wiewken legg 3-5 Eier. Nao veiertaihn (14) Daoge kreipt dei Lüttken ut'n Ei. Nao twei Wäken fleigt sei allein los. Faoken werd sei noch van dei Öllern uppe Ern fauert. Schwattdraußeln bräut woll tweimaol in Johr.

Herr Schwattdraußel

Fru Schwattdraußel

Schriew dei Geschichte in Hochdütsch hier hen!

 
 
 
 
 
 

Lernwör:

Wiewken = Weibchen
hüpket = hüpfen
Kessbeern = Kirschen
faoken = häufig
aaltied = immer
Est = Nest
kreipt = kriecht

 


Dei Vaogelhochtied

1.

Twei Spreien wullen Hochtied holn.
Dei Jungen kömen un dei Oll'n.
Fiderallala...

2.

Dat Meesken röp, dei Jan in'n Tünk,
dei Leiwing, Baukfink un dei Lünk.
Fiderallala...

3.

Ein Feldhauhn köm ut'n Münsterland
mit dattaihn Kinner anne Hand.
Fiderallala...

4.

Dei Hochtiedszug was wunnerbor,
ganz vörne güng dat junge Paor.
Fiderallala...

5.

Dei Truthaohn röp: "Kiek mi eis an!
Ich bin doch uck ein'n fixen Mann."
Fiderallala...

6.

Dei Kiewitt söp, at hei man kunn,
so billig wüdd hei süss nich duun.
Fiderallala...

7.

Dunn sä hei luut: "Wat is dat eigen,
ick kann nich eis liekut mehr fleigen.
Fiderallala...

8.

An'n meisten freet dat Goosewiew,
ehr stünd dei Buuk van't Fräten stiew.
Fiderallala...

9.

Dei Haohn ‚ dei stöttde an dei Kumm'
un schmeet dei ganze Zoppen üm,
Fiderallala...

10.

Dat Hauhn sä luut: "Ick mach't nich sägg' n,
ick mott nao Huus tau Eier leggen."
Fiderallala...

11.

Do köm ein langen Äöntentrupp,
dei Wäk, dei wackelde vörup.
Fiderallala...

12.

Dei greune Specht, dei Timmermann,
köm mit 'ne hölten Weege an.
Fiderallala...

13.

Un in dei neie Weege sprüng,
dei bruune Käönig Jan in'n Tünk.
Fiderallala...

14.

"Dat lett jo", sä dei Tummermann,
"at wenn gi aal wat Lüttkes harn".
Fiderallala...

15.

Dei Kellner Quäksterd trippeld' drock
mit Vörpand un mit Schlippenrock.
Fiderallala...

16.

Frau Kiewitt was dei Käökse hüt',
har up den Kopp den höchsten Tüt.
Fiderallala...

17.

Dat Kuckucksmenske wull noch gern,
dei Bruut mit'n Kuckucksei anschmern.
Fiderallala...

18.

Frau Kuckuck wüdd ut'n Huuse schmäten,
dat Menske har in'n Bruutbedd' säten.
Fiderallalala...

19.

Do flög sei aohne Sterd nao buuten,
den har dei Haowk in siene Schnuuten.
Fiderallala...

20.

Dei Pau häff dunn den Disk affkehrt
mit einen Schwung, mit sienen Sterd.
Fiderallala...

21.

Dei Danz füng an, twei Meesken,
dei danzden up dei Schnesen.
Fiderallala...

22.

Dor up dei Schöddeln danzt dei Lünk,
in'n Stutenkorw dei Jan in'n Tünk.
Fiderallala...

23.

Dei Nachtigall, dei süng in't Greun':
"Dei Leiwde is so wunnerschön."
Fiderallala...

24.

Dei Stork, dei praohlde achtern Haogen:
"Nu giff dat weller neie Blaogen."
Fiderallala...

25.

Un achteran: "Mi is dat klor,
ick bin weer hier, in knapp ein Johr."
Fiderallala...


Lernwör:
Spreien = Stare
Jan in'n Tünk = Zaunkönig
Leiwink = Lerche
Wäk = Enterich
Schnesen = dünner Stock
Leiwde = Liebe
Weege = Wiege
Käökse = Köchin
Kumm = Schüssell
Vörpand = Latz
Schlippenrock = Frack (bei Hochzeiten)
Pau = Pfau


 

 


För di, leiwe Mama!

Van aale Mamas uppe Ern
bis du dei aalerbeste.
Van Harten häbb ick di so gern,
denks aaltied an di taulessde.
Du sorgs un helps mi aale Daoge,
du weis 'ne Antwort up jede Fraoge.
Ick frai mi,
wenn du lachs mit mi.
Mien ganzet Läwen dank ick di.


Översicht över de Deelen
Foto Schwattdraußel, Haohn un Hauhn: Antje Heßler
8.6.2010


na baven