Appels

vun Katja Renfert


na Folge 2
na Folge 3


Düsse Adam hett eendüdig mehr Chips as Appeln eten!

"Adam plünnert sien Paradies". So hett de Künstler Waldemar Otto (boren 1929 in Petrikau/Polen) de Skulptur (Bronze, 1992; de Ünnerbüx hefft em wull poor "Sprayers" "antrocken", denn in de Bibel weer Adam ja nackig) vun den en Appel etenden Adam vör den Hauptingang vun den Botanischen Goorn in Hamburg-Klein Flottbek nöömt.

In'n Sockel vun de Skulptur steiht: "Dieser Adam ist kein Idealbild, denn er steht für die Menschheit, die im Begriff ist, das Gleichgewicht der Natur und sich selbst zu zerstören.
Hier soll mahnend daran erinnert werden, dass ein Paradies zu verlieren ist."


Jaja, de Fruunslüüd doot de Arbeit, de Mannslüüd staht dorbi!

Wat dat mit dat Paradies op sik hett, weet wi ut de Bibel. Eva hett Adam angeblich dorto verföhrt, den Appel vun den "Baum der Erkenntnis" to eten — as Straaf sünd se ut dat Paradies verdreven woorn. Aver de Adam, al beten öller un mit en Wohlstandsbuuk, den de Bildhauer Gerhard Brandes (boren 1923 in Frankfurt/Oder, storven 2013 in Hamburg) 1999 maakt hett, kümmert sik weder üm Eva, de enen ganzen Korv vull mit Appels driggt, noch üm den Appel, den se em anbeden deit. He kiekt beid nich mol an! Un dat süht so ut, as harr se de ganzen Appels ut den Goorn alleen opsammelt! Un he steiht man blots so in de Gegend rüm.

Dorbi heet doch dat ingelsch Sprickwoort: "An apple a day keeps the doctor away". Op Düütsch: Een Appel jeden Dag, dat höllt den Dokter af ...

Hett Adam Bang, dat de Appel, as in dat Märken "Sneewittchen" vun de Bröder Grimm, vergift is? Oder, as dat so schön heet, dat dor "de Worm binn is"? Oder hett he gor dat Leed vun Wencke Myrrhe in sien Ohr, de 1966 sungen hett: "Beiß nicht gleich in jeden Apfel, er könnte sauer sein ..."? Kann uk ween, dat he Angst hett, dat de Appel em in'n Hals stecken blifft un de Kerl denn 'n "Adamsappel" kriggt. Denn köönt wi höpen, dat de versmaden Appel nich to'n "Strietappel" ward. —


So süht een Appelkern ut.

Ursprünglich wuss de Appel in Asien, aver all in dat Middelöller is de Boom na Europa kamen. Hüüttodaags gifft dat över 2.000 Sorten vun düsse Kernobstfrucht.

Den Appelkern wiest dat Bild links.. He sitt in'ne Mitt vun dat sternförmig Fruchtgehäuse.


Oh Schönheit...

Ut düssen lütten Kern is dat wohrhaftig mööglich, en Boom to trecken. Dat duurt twoors 'n Tiet, aver denn …

Vun Enn April bit Mai blöömt de Appelbööm witt bit zoortrosa. Se treckt 'n Barg Immen un annere Insekten an, un de bestäubt se denn. De Pollen blifft meist an'n Lief achtern backen, un so köönt se an de neegst Blötenstempel lannen, dörch Afströpen or tofällig.

Op dat nafolgen Foto ist to sehn, wo de Appels langsam ranwassen.


Se seht eher as Hagebutten ut — dat sünd ja ok ehr Verwandten


Nanu, sünd dat Lollies dor ünnen?

Aver dat gifft uk 'n poor, de fallt fröh af. Op dat Foto is to sehn, wo lange Stengels se all hebbt. — Düsse jungen Appels hebbt noch keen utbildt Kerne un köönt noch keen niege Appelbööm seien.


Appelboom in den Loki-Schmidt-Goorn

So süht 'n jungen Appelboom ut. Wenn wi Glück hebbt, kriggt he schöne Appels, de denn in Harvst afplückt ward.


© Katja H. Renfert — renfert.net
28.6.2016

trüch


na baven


na't Flack

na de Startsiet