Dat Bawhuus, Deel 6:
Wassily Kandinsky
(1866 -1944)

Van Ludgerd Lüske

Disse Kunstmann, in Russland born, gellt as dei Erfinner und Theoretiker van dei afstrakte Maolerei. Dat Bawhuus ka'm sik aohne W. Kandinsky goarnich vörstellen.

1866 kööm Wassily Kandinsky in Moskau up dei Welt. Upwossen is hei in eine börgerlike Familje mit Sinn för Kultur. Mit 20 Joahr füng hei an mit ein Rechts- un Wirtschupsstudium an dei Universität in Moskau. Nao sien Exaomen wörd Kandinsky Lehrmester an dei juristischken Fakultät in Moskau. Hei interessierde sik för masse Saoken un was groot dorinne, sik sülvs wat bitaubringen.

1895 argde Kandinsky sik up ein Utstellen van französke Impressionisten in Moskau äöver den Maoler Monet. Dat Bild, dei Heihoop, was nich nao sienen Sinn. Ein Maoler harr doch kien Recht, so tau maolen, dat et schwoar was, dei eigentlike Saoke in dei Künne tau kriegen.

In dat Joahr 1896, hei was 30 Joahr old, beschlööt hei Künstler tau wern un güng nao München. Kandinsky lööt sik dor an dei Akademie van dei schönen Künste för veier Joahre inschrieven.

Siene Kunstwarke fünd man af 1903 in Utstellungen äöverall in Europa.
1911 grünnde hei tausaome mit annere expressionistischke Maolers den Kring Dei Blawe Rieder. Dor fünnen sik Paul Klee, Franz Marc, August Macke, Gabriele Münter, Alexei von Jawlensky un Alfred Kubin.
Kandinsky was mit Franz Marc dei Baos, wor dei annern mangers unner lien mössen.

Mit dei Tied wörd Kandinsky dei Theoretiker van dei afstrakte Maolerei. 1910 entstünd sien eierstet afstraktet Wark — ein Aquarell.
1912 bröchte hei ein Bauk äöver dei Theorie van dei Afstraktschioon rut.

Dei Blawe Rieder füllt bi'n Anfang van den Eiersten Weltkrieg uteinanner. 1914 güng Kandinsky trügge nao Russland, wor hei bit 1921 bleev. Wat läöter, 1922, kööm hei wedder nao Düütschland un lehrde un warkede bit 1933 an dat Bawhuus in Dessau.

Disse Bawhuustied was för Kandinsky siene Künst un sien Wark dei beste.
1933 — dei Nazis köömen an dei Macht — wörd alls, wat moderne Kunst was, as utoart anseihn un Kandinsky sien Wark wörd unner Beschlag naohmen.

Kandinsky emigrierde nao Neuilly bi Paris, wor hei 1944 störv. Tau dei Tied, as hei nao Frankriek utwannern dö, was Kandinsky in dei USA as beneumte Maoler woll bekannt. Sogoar Salomon Guggenheim sammelde sien Wark.

Wassily Kandinsky bawede siene Maoloart äöver Joahre henweg staodig up, nich up maol sprunghaft, so as tau'n Bispill bi Pablo Picasso. Seine eiersten Maolereien wören expressiv, farvenfroh, aover figüürlik komponeert. Disse Oart lett an Henri Matisse denken. Af 1910 süht man den Äövergang tau dei afstrakte Maolerei. Dei figüüliken Deile werd reduzeert un gaoht tauleßte heil verlüß. As ein Musiker neumt Kandinsky siene Warke Impressionen, Kompositschioonen of Improvisatschioonen. Af 1920 werd sien Wark ümmer mehr geometrischk.

Dat Lenbach Museum in München hett eine recht groote Sammlung van Kandinsky-Biller, b'sünners ut dei Tied van den Blawen Rieder. Disse Biller hett Gabriele Münter an't Museum vermaoket, sei hörde tau den Blawe-Rieder-Kring. Sei hett bit 1914 mit Kandinsky tausaome lävet, don güng hei trügge nao Russland. In dei Nazi-Tied harr Gabriele Münter einen grooten Deil van Kandinsky siene Biller in den Keller van ehr Huus in't bayrischke Vöralpenland verwoahrt.

Hier en poor Links:

• Lenbach-Museum

Kandinsky-Biller:

• Artelino