un mien Riek,
dat so groot
un so wiet
buten in't Dörp
an't Enn
vun'e Welt.

"Sunsch Wisch",
siet Uröllerns
Johrn.
Bomben haugten't
in Gruus un in Muus
Nu Vagels ehr Land.

Mien Dörp!

Nüms weit,
wat mien Borg
alltiets
ward stahn.
Naams kamen
un gahn.

De Borg in't Hart:
"Dor bün ik Tohuus."

Nu is mien Tiet:
De Steed
achter de Schüün!
Den Rüüch
in noch frisch
Morgenluft

warmen
de swatten Bree,
de gistern
den Dag
vull drünken
güllne Sünn.

Ik mutt
an't Wark:
Dat Lock mutt
wat deper,
de Torm
beten höger.

Achtern
Richt Oost,
dor an de Kimm,
wo Heven un Eerd
sik stöten,
blödig, dat Rood.

Ierst bloots
een Striep
snuurgraad.
Blaag, hell na düüster,
een Kuppel doröver.

Allens avers
ünner'n fledig' Slier
vun nevlig Luft,
de upstiggt
över Wischen,
ut Gravens.

Vun Wieden
een Hahnkreih,
uns Ganter
antert
mit häsigen Roop.
Mövenfloog!

De Farven,
nu blager as blaag.
Höger de Heven.
Geel-orangsch-rood.
Nu stiggt's up,
de rood' Kugel.

Uns true Sünn
rüppt up
den Dag,
'n niegen Dag
in't lütt Dörp
an'n Bodden.

Strahlen
dörch'e Luft
straken de Eerd,
Navers's Hoff
wakt up,
ok de Buur.

Wat later
in Hellnis un Warm
gackern de Höhner.
Melktiet is för
Irma,
uns Koh.

"...dor bün ik tohuus" is ut dat Leed entlehnt, wat Martha Müller-Grählert vör 100 Johrn op de "Oostseewellen" verfaat hett. Bekannt worrn is dat denn avers mit de "Noordseewellen". Man dat gifft noch veel mehr Verschoonen vun Müller-Grählerts Gedicht un ok anner Texten op de bekannte Melodie dorto.

Een poor Links to Martha Müller-Grählert:
www.all-in-all.com/1015_1.htm
www.charly.ping.de/wiw/graehlertma.htm
www.felix-krause.de/mine_heimat.htm (mit Musik - Luutsprekers an!)
www.felix-krause.de/heimat1.htm (mehr Gedichten vun Müller-Grählert)

To de Sunsche Wisch:
www.nvp.shuttle.de/fritz-reuter/sundisch.htm