Kunst in Büdelsdörp

vun Karl-H. Nissen


Se köönt de Fotos per Klick vergröttern! Trüch kaamt Se denn mit den Zurück-Knoop op de Browser-Symboolliest

"Kunnst du mi mal vertellen, Korl, wat du al mal in Büdelsdörp west büst?"

"Büdelsdörp? Wo is dat denn, wat sull ik dor?"

"Korl, Heimatkunde ene Fief! — Büdelsdörp liggt an den Nord-Ostsee-Kanal, in de Mitt vun uns Land. Un dor, Korl, hett dat vör 18o Johr en Iesenhütt geben."

"En Iesenhütt! Hier in uns Land! Tüünkraam!"

"Korl, dat is wohr. De hebbt iesern Avens maakt un Baadwannen un veel annern Kraam. De Hütt gifft dat nich mehr. Avers dat Grundstück is noch dor. Wietlöftig, as 'n Park orrer enen groten Goorn, mit Appelbööm un Water, en Kaffee is dor — un Kunst, in de Remise un överall Kunst. Kunst un noch mal Kunst.

Wat so Künstler ut enen Granitsteen orrer enen Marmelsteen ruthaut, du müsst di wunnern. Wat dat sien sall, wat dat bedüden deit, dor müsst du nich na fragen. Du müsst di so enen Steen ankieken, mal mit de Finger röverföhren. Dat is ruuch orrer spegelglatt. Un groot sünd de Kunstwarken, reesengroot. Un swoor, segg ik di. Ik kunn dat bi uns nich ünnerbringen, ik kunn dat ok nich betahlen. Wenn ik mi överlegg, wo lang en Bildhauer an so 'n Ding rümhaut hett...

Un all disse Steen staht dor in den Goorn, up den Rasen, twischen de Bööm. Ik weet mi nix dorbi to denken. Man gefullen hett mi dat liekers. Denken mutt een ja nich alltied.

Un dat Best weer — segg dat avers nich wieder —, dor stünnen in enen wieden Krink so bi föfftig nakelte Fruuns!
Du kunnst di dor en Frau utsöken, weer allens dor. Ut alle Länner un Tieden. De mehrsten weern ganz bruun. För uns weern de villicht en beten lütt, so enen Meter hooch. Se weern all recht stramm buut un keken mi unerbittlich an.

Ik stünn so 'n beten höger up so enen lütten Barg, ik harr all de Deerns goot in'n Blick. Mitnehmen wull ik keen. Wat sull ik dormit?

Man annersrüm, stell di mal all de vele Arbeit vör, Korl. Un ik glööv, de Künstler, de wüllt de Saken verköpen.

Avers dat segg ik di: Tokamen Johr föhrt wi wedder na Büdelsdörp!"


Infos: NordArt Büdelsdörp, Kunstutstelln un Skulpturenpark op dat Carlshütte-Gelänn, noch bet 27. September 2009.
2010 geiht de Utstelln mit niege Kunstwarken vun 12.6. bet 26.9.

13.9.2009

trüch


na baven


na't Flack

na de Startsiet