De Leiw

Versen vun Erika Fischer, Biller vun Ines Hoefs

Wenn du kümmst

Wenn du kümmst,
geiht op de Sünn.

Ehr Strahlen drapen mi in't Hard.

Wenn du geihst,
ward s' ünnergahn.
Schatten blieben trüch. —
Ik bün allein.

Wenn du kümmst,
giffst du mi rode Rosen;
ik weit, wat dat bedüdt!
Wenn du geihst,
laten s' de Köpp al hangen,
genau wi ik. —
Ik blief allein.

Wenn du kümmst,
hür ik Musik.
Ik danz mit di de halve Nacht.
Wenn du geihst,
hür ik se immer noch.
Doch is dat musingstill.
Ik bün allein.

Wenn du kümmst,
gah nich wedder.
Leiw gifft't nich all Dach,
blief bi mi för ümmer!

Leiw

Dat hest du mi secht

Wisst mit wi läben.
Mit mi gahn,
barchup, barchdal,
wenn de Wech ok wiet.
Oewer Brüggn, de möör sünd.
Du giffst mi de Hand,
höllst mi fast,
hest du secht.

Wisst mit mi läben.
Mit singen un danzen,
wenn't nörig is,
ok mal strieden.
Lachen un weinen,
mannigmal all's in einem.
Wisst mit mi läben,
all's gäben.
Dat hest du mi secht.

Leiw
Wenn Leiw flüchtig ward

Lat los,
wenn Leiw flüchtig ward.
Lat los,
wenn't nich mihr geiht.
Is wat tau Enn,
fangt Nieges an,
müsst dat bloß entgegengahn.
Verkrup di nich,
lat all's tau.
Ogen apen, wiet dat Hart,
so finnt de Leiw ehren Wech
un flücht na di.
Holl se fast,
lat s' nich mihr los!

Leiw


Biografische Notiz tau de Künstlerin hier


11.5.2023


trüch


na baven


na't Flack

na de Startsiet