De Deern in Glück-Stadt vun Katja Renfert Se köönt de Fotos per Klick
vergröttern. Trüch kaamt Se denn mit den Zurück-Knoop
op de Browser-Symboolliest.
An'n 22. März 1617 hett de däänsch König Christian IV. , kort C4 nöömt, den Grundsteen för Glückstadt leggen laten. Dat schall glücken un dat mutt glücken, Düsset Johr is Glück-Stadt, as ik dat
schrieven do, also 400 Johr old warrn. Veer Johr tovör harr de Stadtverwaltung en ole Kastangboom
an'n Markplatz afhacken laten, wieldem se nich mehr gesund weer. As ik de Deern dat erste Mol sehn heff, harr ik dacht:
na so wat, uk en Fru kann op'n Water lopen! In de School weer uns ja
bibröcht warrn, Jesus hett dat doon. Aver: wi Fruunslüüd
köönt dat uk! As ik wedder torüch in Hamborg weer, heff ik den Künstler anmailt, un he hett fix antert: Kummt Se wedder na Glück-Stadt, ik arbeit dor in dat open Atelier Provianthaus, denn köönt wi uns drapen un schnacken! Spontan, as ik bün, gung ik poor Daag later to de
Iesenbahn un na Glückstadt, dor to dat Provianthaus.
De Döör weer open, aver de Künstler Arnold Gietl weer
nich dor. To'n Glück stunn dor de nette Huusmeister Miroslav, un
de hett versöcht, Arnold Gietl antoropen. De fröhere Kastang, nu vun den Künstler to'n Deern woorn, kiekt över dat Water, den Fleth, op den nie plant Boom, en Platane, de siet ca. 3 ½ Johren dor steiht. För mi en Teken, nix geiht verlorn, de Natuur levt wieder, man blots in en annere Form. Mit de beid Hannen will de Künstler seggen: nehmen un geven. He meent, de goldfarven, opene Hand is dat geven. Ik heff seggt: Nee, jümmer de Hand opholen, dat is nehmen, ik will hebben ... Aver wie dat mit de Kunst so is: elkeen hett sien egen
Geföhl un Dinken.
Herr Gietl hett mi noch seggt, de Kopp vun de Deern weer bi den Boom fröher de Stamm ünnen! Wenn Se Lust hebbt, fohrt Se na Glück-Stadt un kiekt sülms mol. |
||
Fotos: Katja Renfert mehr vun de Autorin hier 25.6.2017 |