Wi hebbt wohraftig veer Slötter orr Burgen in uns Kuntrei üm Leer. De Evenburg heff ik ja al vörstellt, denn gifft dat noch de Harderwyken-Burg un de Haneburg. Düt hier in't Bild aver is de Phillippsburg.

För mi is de Philippsburg dat schöönste vun de veer Slötter. Nich vunwegen de Grött, avers de Farven — wenn dor vör de Döör de Linnen in satt Gröön staht: dat haugt di üm. Mien Bild wiest de harvstlich-winterliche Borg, wieldat denn mehr Details to sehn sünd. Man in'n Mai, wenn de Ranken üm den Doorbagen blöht — dat passt perfekt mit den Efeu överall ümrüm un dat starke Geel vun dat Muurwark. Mit röödlichen Stuck, överall Smuck un Tier, heel riek an Facetten. Wenn ik dat nau beschrieven wöör, wöörn ji ut't Staunen nich rutkamen.

Över de Bugeschicht kannst kort nalesen bi Wikipedia. Dat Huus stammt ut dat laate Barock un weer — schoonst den Naam "Burg" — al jümmers to'n freedlichen privaten Wahnen för en Adelsfamilie dacht. Hüüt is dat en Graf vun de Schulenburg, de dor wahnt. Wi weern dor mal inlaadt; de Graf weer as Diplomaat in't Butenministerium anstellt west un en heel nette Gastgever. He föhr uns dör de Rüüm un Hallen, richtig groot is dat dor vun binnen, wies uns allens un ok sien Fotos mit internaschonale Prominenz, Königin Elisabeth, Genscher, Weizsäcker un mennig annere. Ok de Park is schöön un deelwies apentlich. De Graf vertell uns ok en Geschicht ut den 2. Weltkrieg. Dormalen weer en Granatsplitter direkt in de grote Wandklock inschaten, jüst in den Momang, as de Döör opmaakt woor. Den Inslag kannst dor hüüt noch in sehn.

Wokeen dor de Finster putzen mutt, hett en harten Job, avers schöön warrt dat doch ween.

---

dat lütte slott

dörch rugen wind kämp ik vöran.
alldag is gries un hart.
mien schirm flüggt weg, ik holl nich an.
denn in mien binnern warrt

all düt vun sünnengeel dörstrahlt.
wat schöön is, bruukt keen sinn.
düt buwark hett mien hart sik maalt
un wahnt dor alltied in.

4.12.2022