En mächtige un gefährliche Fiend överfallt en freedvull Gegend. Dat kennt wi doch?! Ja, ut de Geschichte — uns egen Geschichte; mal weern uns' Vörfahren de Angriepers, mal aver ok nich. In't Johr 884 hebbt de Wikingers uns' Oostfreesland angrepen.

Al tovöör harrn se de Gegend utkundschaft't, in de rieken Marschen weer wat to halen, un dat moorige Land in't Binnere weer dormalen noch ganz lerrig un intresseer nüms. Aver an de Küst möken de Wikingers al orrig Schaden. Dat wulln sik de Fresen nich länger ankieken. To de Röverie keem dorto, dat de Wikingers noch Heiden weern, de Fresen aver mehrst al christlich. Un wat dormalen de Bischööp weern, de weern ok nich bang: De Bischop Rimbert smeet sik in Kampfmontur un tröck mit de Fresen vörweg in de Slacht gegen de Wikingers!

Wat denn keem, weer de "Slacht bi Norditi", hüüt Norden. De Fresen, de ehr Land un ehr Frieheit verdeffendeern, weern de Wikingers övermann un slöön jüm torüch. Mennig Wikingers woorn ümbröcht orr verdrünken op de Flucht. Allens, wat se tovöör wunnen harrn, hebbt de Fresen jüm afnahmen. De Wikingers sünd dorna kumplett ut Oostfreesland utneiht. Dat warrt hüüt noch elkeen Johr in de Stadt Norden fiert.

De Fresen hebbt dorna ehr Büüt as gemeenschaplich Egendom hollen, hebbt fast tosamenhollen un ok later nienich Ünnerdrückers in ehr Land düllt. Dat is bet hüüt de "Frees'sche Frieheit".

---

dien schipp is stolt un fürchterlich,
glitt dör de wellen as en blix.
ik staun vun wied un holl mi trüch,
man anners förcht ik nix.

dien sweert is scharp, dien gang is ruug,
dien gier is groot, dien slag is fix.
en drakenkopp tiert dienen bug.
ik hööp, du deist mi nix.

ik stah an't över, hööp op freed,
mien land is freedvull — avers wenn
dien scheep op miene küsten gleed:
denn lehrst mi kenn'n!

4.6.2022