Karl H. Nissen

Gelbe Mopsen

Lesen deit Karl-H. Nissen in Holsteener Platt.

Bi 't Lesen in olle Dokumente sünd mi "Gelbe Mopsen" ünnerkamen. Vun sowat heff ik noch nie nich wat höört. Wat sall dat sien? Villicht dicke gele Hunnen?

Na de Herrenfähre woor de Herrenbrüch buut. Klick up to'n Vergröttern!

Also, de Saak is de: Ik bün jümmers noch dorbi, wat över de Herren-Fähre hier in Lübeck ruttofinnen. Disse Fähre hett dat geven, lang bevör dat den Herren-Tunnel un de Herrenbrüüch geven hett. Bi disse Fähre stünn ok en Fährhuus för den Fährmann un de Fährknechte. Ok en Peerstall weer dorbi un en Stall för de Göös.
Wenn ganz laat in de Nacht noch en Fohrgast ankeem bi dat Fährhuus, de kunn dor över Nacht blieven.

Nu weer dat so: Dat Fährhuus höör de Stadt to. De hett dat verpacht. Un Geld weer jümmers knapp, ok in olle Tieden. Repareert wörr blots denn wat, wenn dat gor nich anners mehr güng. Mal hett de Fährmann sik beklaagt — ganz fründlich hett he dat maakt —, dat de Footbodden ganz twei un vun Ratzen un Müüs dörchwöhlt weer.

Eenmal müß wat ümbuut warrn, de Gaststuuv un ok de Wahnstuuv harrn dat nödig. Dorto hebbt de Muurlüüd 2.500 niege Muursteen vun de St. Petri-Tegeli kregen. Disse Tegeli hett dat lange Tiet geven, bet 1892. Wenn du mal enen ollen Tegelsteen findst, in den en Slötel rindrückt is, de is denn ut de St. Petri-Tegeli. Dat is Petrus sien Slötel.

Klick up to'n Vergröttern!

Hüüt: De nieg buute Herrentunnel. So süht Foortschritt ut — süüfz! Is de Fähre baven nich schöner?

En poor Johr vörher is ene niege Stuuv an dat Fährhuus anbuut worrn un dorto hett de Muurmann 3.000 "gelbe Mopsen" kregen. Dat is ganz düütlich to lesen in dat ole Dokument, "gelbe Mopsen" heet dat.

Un ik much doch nu to geern weten, wat dat sünd. Ik fraag överall rüm, villicht is dor doch een, de mi seggen kann, wat dat sünd: "gelbe Mopsen".

Nadraag: Un nu hett Rudi Witzke sik up de Söök maakt un düt funnen. Mopsen orr Moppen sünd en besünner Aart Muursteen west, un de hett de Fährmann sachs kregen, dat he sien Huus sülven repareern kunn. Mööt wi us dat so vörstelln?: Arbeitslü mit'n Ossenkarrn (orr mit twee, dree Ossenkarrn? Wat wiggt so'n gele Mops? Wa veel dorvun köönt twee Ossen in een Fuhr trecken?) sünd opmaal bi dat Fährhuus opduukt, hebbt en Barg vun 3.000 gele Steen vör dat Fährhuus aflaadt un seggt: "De Raat lett schön gröten, seh man to, dat du dormit klaarkümmst!" Un de Fährmann is klaarkamen. De Rotten un Müüs müss he sowiso sülven doodslaan!