Den Börgermeister Wullenwever güng dat ok nich beter.

Dat weer in de Tiet vun Martin Luther, ok in Lübeck weer de mit siene Gedanken ankamen. Veel Unruh weer in de Stadt. Wullenwever hett veel bewegt, ik glööv, he kunn goot snacken, man en groten Diplomat weer he nich. He hett sik ok keen Frünnen maakt, as he ut Lübecks Kirchen allens an Gold un Sülver ruthaalt hett un insmölten leet.

He weer Börgermeister, man denn hett de olle Raat em afsett. Liekers hebbt se em nich ganz fallen laten, he sull Amtmann warrn in Bergedorf. Dat weer en egen Geschicht. Bergedorf hett en Slott, höör to de Tiet half to Lübeck, half to Hamborg, un so keem de Amtmann mal vun dor un mal vun dor. Dit Amt weer Wullenwever nich noog.

He is över de Elv gahn na Neddersassen, dor weern arbeitslose Soldaten. Mit de wull he gegen de Dänen trecken. Nu weer in dat Land de Bischop vun Bremen de Herr, de hett nix hollen vun Luther. Sien Lüüd hebbt Wullenwever grepen un bi Wolfenbüttel hebbt se em insparrt, schunnen un quält un denn to'n Dood verurdeelt.

Man wull em in Stücke haun, vun de Fööt na baben.
An'n End hebbt se em begnadigt: Se hebbt em toeerst den Kopp afhaut.

Nu güng dat nich alle Börgermeisters so. Wi hebbt na den Krieg ganz düchtige Mannslüüd dor hatt. De eerst Börgermeister 1947 — also na den Krieg — weer Otto Passarge. He weer Muurmann, sien Fru harr enen Tante-Emma-Laden in St. Lorenz. He weer en ganz handfasten Keerl in disse lege Tiet. In Lübeck leeven so bi 100.000 Flüchtlinge; de mit Wahnung, mit Eten to versorgen, dat weer swoor.

En Tietlang later weer Dr. Knüppel Börgermeister. He harr en faste Vörstellung vun uns olle Stadt, de in'n Krieg dull tweislaan worrn weer. Disse Stadt sull för Minschen to'n Wahnen sien, se sull en Denkmal sien un ene Stadt to'n Inköpen.

Dat mit dat Denkmal, dat is wat worrn: Lübeck is Weltkulturerbe.
Ok mit dat Wahnen hett klappt, hüüt leevt meist 15.000 Minschen hier in de olle Stadt twischen Traav un Wakenitz, un dor sünd vele junge bi.

Mit dat Inköpen süht dat nich so goot ut, vele Ladens staht leer.

De böverst Lübecker, dat is de Stadtpräsident.
Ene "Fru Börgermeister", de hett dat noch nicht geven, aver "Fru Stadtpräsidentin" gifft dat. In't Johr 2014 heet se Fru Schopenhauer.

En Mann mit enen egen Kopp, dat weer Helmuth Niendorf. Fiev Johr weer he Stadtpräsident, denn hett em dat langt mit de hoge Politik in't Raathuus. He wull ok kenen Orden hebben för sien Arbeit, he is wedder as Murer in de Marien-Kirch up dat Gerüst stegen un hett de Gewölbe repariert.