Tramünn:
De Kaisersaal in de ole Vogtei

von Antje Heßler, Tramünn

En lütten Artikel in de Lübecker Narichten bröch mi up de Been. Dor stünn to lesen, man kunn an 3.März Klock twee den Kaisersaal in de ole Vogtei bekieken. Dor müss ik hin. De Vogtei kenn ik goot, aver vun enen Kaisersaal in Tramünn, dor harr ik noch ni wat vun höört. De Vogtei is en smuckes ganz oles Huus vun Backsteen, twee Etagen hoch mit enen Treppengevel. In't Oog fallen deiht de grote Rokokodöör. Dat Huus is en vun de öllsten Hüüs in Tramünn. Bit 2002 weer dor noch dat Polizeirevier ünnerbröcht. Dorna hett dat eenige Johr leer stahn.

De Vogtei gehöör dat Land Schleswig-Holsteen. Dat Huus sull verköfft waarn. Aver dat Land funn kenen Afnehmer. 2005 hett nu endlich en Privatmann dat Huus övernahmen.
Vör de Vogtei luren al en groten Barg Lüüd. Al töövten se un wull geern in't Huus. Endlich güng dat dörch den Siedeningang in de Vogtei. Dat weer en Drängeln un Schuven! Binnen weer dat Huus en grote Busteed. De Deck weer mit luder Balken afstütt. Överall leeg Bumateriaal. För so veel Lüüd weer de Ruum veel to lütt. Sull dat etwa de Kaisersaal ween?

Meern in den Ruum stünn de Huusherr an en Lattendisch. He hett uns to'n Koffie un Brownies, Koken na en oles Rezept vun 1398, inlaadt. De Koken smeckte goot. Denn verkloor uns en Fru vun Lübecks Geschichtsvereen wat över de Historie vun de Vogtei:

De lübische Vogtei is al in dat late Mittelöller in dat Huus ünnerbröcht weest. Na en groten Brand is se 1551 wedder upbuut woorn. 1599 keem den noch en Anbu dorto. De lübischen Stadtvöögt hebbt in dat Huus ehr Regiment föhrt. Dor wöör de Fru vun den Huusherr ünnerbraken. He vertell: "Enen Vogt sall dat geven hebben, de hett de Seelüüd von de Scheep inlaadt un hett ehr in de Vogtei düchtig wat to Drinken geven." Wieder wüss he to berichten: "De Seelüüd weern dorna so duun, dat se nich mehr up dat Schipp kunnen. Dor dörfen se in de Vogtei slapen. Aver an'n annern Moorn keem dat böse Upwaken, se müssen allens betahlen." Un dat sall sik in den so nöömten Audienzsaal (Kaisersaal) afspeelt hebben. Dorto mütt man seggen, de Vöögt harrn keen fastes Inkamen. Blots dat Geld för de Fähr na den Priwall dörfen se inbehollen.

"Aver dor wöör nich blot fiert, ok Recht wöör dor spraken. Un ok hoge Herren ut fremde Lannen kemen dor hin", wüss de Fru wieder to berichten. Nu wies se up de Deck. En enstimmig "Aah" weer to höörn. An de Deck weern Kassetten un in de Kassetten luder Biller vun de römischen Kaiser to sehn. In en Kassett weer de lübbsche Adler mit de Johrstall 1623. De Maleree weer also al ut dat Johr 1623! Un na de Biller vun de römischen Kaiser hett de Ruum den Namen Kaisersaal kregen. Solk goot erhollen Malereen weern in ganz Schleswig-Holsteen eenmalig. Eerst bi de Renovierungsarbeiden sünd se to'n Vörschien kamen. Vörher weern se dörch en Twischendeck nich to sehn.

Na de Besichtigung vun den Kaisersaal hebbt wi noch dat hele Huus ankeken. Dor geiht en wunnerbare ole Trepp na baben. Un boben weern ok noch Malereen ut en Tierzyklus to bekieken. Dat Huus steekt vuller Överraschen.

Wo geiht dat nu wieder? De eenmaligen Funde hebbt de Vogtei ut Tramünn in de Reeg vun de historische Hüüs in Lübeck stellt, un de sünd vun de UNESCO to'n Weltkulturaarv erklärt woorn. Pläne för dat Bruken vun de Vogtei gifft dat noog.

In Sommer kunnen wi de Vogtei wedder mal bekieken. Dor harr sik al en Barg ännert. Finster un Döörn weern utwesselt un harrn niege Farv kregen. Buten vör de Rokokodöör geev dat Beer, anner Saken to'n Drinken un wat to Eten. Wüllt wi höpen, dat datHuus in't niege Johr mit veel Leven füllt warrt!

Vör en poor Daag heff ik den Besitzer in de Vogtei andrapen. He hett sülven Hand anleggt, weer mit de Schuuvkoor un de Murerkell an't Arbeiden, dormit allens to rechten Tiet fardig warrt. To'n 1.März 2007 treckt al de eersten Pächter in. Man kann em dorto blot allens Gode wünschen. Vun buten is de Vogtei al jetzt en richtig Smuckstück för de Vörreeg vun Tramünn woorn.