Notizen ut'n Märzmaand


wiesfingers wiest
den weg vun't ies;
de weg, de geiht na narms;
de wiespahl sülven is de bott:
eerst wasst, denn swinnt sin arms...

 

 

 

de ganz welt daut!
glöövst dat? — benaut
kiekt wi in't wiede Narms:
noch is dat witt —
man bald ümslütt
uns gnadenlose warms ——

 

du schönes kleed
vun Witt! besneet
un prickelnd överfraren:
wi hebbt di noch!
denn sünd wi doch
noch jümmers unverlaren...?

 

och letzte snee!
bliff in min nehg
un laat di an mi hangen!
laat noch düt johr
in mund, bruun, hoor
kristalle sik verfangen...


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet