Notizen ut'n Maimaand


moment-opnahm

de letzte raps. vun't grote geel
en echo noch in't gröön.
un dochen dicht, in vullen weel
un ok nich minner schöön.
so steiht min leven in düss tied:
vullendt dat helle blöhn;
nu wasst't na binnen un töövt blied,
bilütten frucht to sehn.


dat oog

'keen kiekt mi an? 'keen höllt mi fast?
de soot, de boom? de sünn?
'keen grippt na mi in stillste rast?
orr bill ik mi dat in?

küll un vun wied höllt mi fixeert
en dunkelblaages oog —
ik heff de blaage stunde stöört
min aten weer al noog

de blaage stunn — de gröne diek,
de still, sekundenfall,
se hollt mi fast mit ehren blick
in blaagen ieskristall...


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet