Osterspaziergang

vun Johann Wolfgang Goethe, Plattdüütsch: Friedrich Hans Schaefer


Vun Iesgang free sünd Strom un Beeken,
sacht weiht de Fröhjohrswind över den Knick,
neern in de Wischen, dat Gras steiht al dick,
de ole Winter hett sick versteken,
sleek in de Bargen, möd an sien Krück.
Vun dor schickt he nochmal 'n Hagelschuur,
doch dat Spektakel wehrt meist nich lang:
Poor witte Stripen op gröne Natur.
Aver de Sünnschien, de hett keen Bang!
Saft drängt in Gras, in Telgen un Knuppen,
blitzblanke Lichter in Dau un in Druppen.
Un fehlt dat an Blomen in't gröne Revier,
seht wi doch lustig bunt Minschenvolk hier.
Kiek vun den Anbarg na Stadt hento:
Dor quellt dat ut'n Door, peddt sick op de Schoh!
De Lütten, de Langen, de Dicken, de Dünnen,
un all sünd's behangen mit sünndaagsche Plünnen,
all wüllt se lustig ehr Ostern begahn,
sünd jüst as ehr Jesus ut Gräffnis opstahn.
Ut enge Straten, Hüsung un Stuven
drängt sick dat vör in grellbunte Druven!
Vun Dörpen her Danz un nochmal Gewimmel:
Hier föhlt sick dat Volk so recht in sien' Himmel!
Un jedereen denkt mit datsölve Begehren:
Hier bün ick Minsch, un nüms schall mi't wehren!

 


Ut "Dat Speel vun Dokter Faust"
vun F.H. Schaefer na J.W. Goethe,
Verlag Schuster Leer.
Hier wiest mit fründlich Verlööv
vun Fru Heike Thyssen, Hamborg,
de dat Uurheberrecht hett.
Fotos: Marlou Lessing

19.4.2020


trüch


na baven


na't Flack

na de Startsiet