De "Wächtersche"

Skulpturenpark Seekamp

van Antje Heßler


Se köönt de Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest

Annerletzt leet mi en Artikel in de Lübecker Nahrichten upmarken. Dat Bild up de Kultursiet keem mi glieks bekannt vör, de Skulptur kenn ik. Wi weern vör eenige Johrn in Strande för en poor Daag in dat Strandhotel inquarteert. Dor hüng in den Uthang en Bild vun den Skulpturenpark Gut Seekamp.


Skulptur mit mobile Rasenmeihers

Blick ut uns Finster in Strande

Glieks an neegsten Dag na en godes un riekliches Fröhstück mit den Blick över de Kieler Förd güng uns Fohrt bi herrlichen Sünnenschien los. Den Park to finnen weer gor nich so eenfach. Wegwieser na Gut Seekamp geev dat nich.Över en Landstraat mit olen Boombestand hebbt wi dat Goot aver doch funnen.


Infohrt na'n Gootshoff

En grote Infohrt mit Koppsteenplaster to den Park leet den Blick up dat Gootshuus ut roden Backsteen frie.

Vör dat Gootshuus stünn up en rundes frisch meihtes Rasenbeet al en Skulptur. Later hebbt wi leest, dat weer Hans Kocks Skulptur "De Wächterin"!

Minschen weern narms to sehn. Intritt wöör ok nich verlangt. Wi hebbt unsern Wagen denn ganz eenfach vör dat Gootshuus afstellt.


De "Wächterin"


Vör den Peerstall


En schöne Rücken kann ok entzücken — de "Grote stahn Fru"

Vörbi an en smuck restaureertes Strohdackhuus güng unsen Weg dörch den Park. Dat Huus höörte seker fröher to de Stallungen. Oolen Boombestand smück den Park. Wiet verstreut kunnen wi al de neegsten Skulpturen utmaken. In Steenwänn inlaten weern Reliefs afbildt. Twischen de Wänn stünnen Skulpturen, sehg meist enen Hoff liek. Un överall weer de herrliche Park.


Relief-Wänn, dormang Skulpturen


De Rasenmeihers sünd nich ganz so kunstsinnig

Veerbeenige Rasenmeiher höllen dat Gras kort un keken uns nadenkern orr kiebig to. Immer noch harrn wi kenen Minschen drapen. Wi weern richtig vertövert. De Schaap schienen dat eenzig Lebennig üm uns; man na un na schienen ok de Skulpturen lebennig to warrn, as weern se sülven vertöverte Minschen, de jüst noch hier warkt harrn, ehrdat wi kemen. — De Utblicke up de wunnerbore Sleswig-Holsteensche Hügellandschaap dünn noch ehr Deel dorto.


Reliefwand


En Formation to'n Sitten


Düsse Figur heet "Roos för Charlie Rivel"


Düsse Figur heet "Süster vun de grote stahn Fru". Se steiht de anner Figur güntöver.

Nu wullen wi aver geern noch wat över den Skulpturenpark weten. Up unsen Trüüchmarsch versöchen wi in dat Herrenhuus to gelangen. Na lang, hartnäckig Klingeln wöör uns de Döör wohraftig upmaakt. En Fru leet uns rin un hett uns so allerhand över dat Goot un den Park vertellt. Dat slichte Herrenhus is vun 1876, de Park is över 3 Hektar groot. En richtig Verwaltung mit Plaans för en Besichtigung geev dat na den Dood vun Hans Kock (1920 - 2007) noch nich.

Dat de Skulpturen vun den Bildhauer Hans Kock weern, wüssen wi. Dat Gootshuus Seekamp un de Park höörten sien Fru. De beiden hebbt den 1990 tohoop de Hans-Kock-Stiftung gründt. Siet de Tiet staht de Skulpturen in den Park. Hans Kock weer en bekannten Künstler in uns Land un hett 1972 den Kunstpries vun Sleswig-Holsteen kregen.


Düsse Skulptur heet "Boom"...


...un düsse hett sik en Platane as Standort utsöcht


"Meteor", na dat beropen Springpeerd, heet düsse Skulptur.
Süht ut as Grekenland: Stolt ok in'n Ünnergang!

Na sien Dood 2007 hett dat eenige Maleschen mit de Verwaltung geven. Uns weer nu kloor, worüm wi narms Minschen up den Hoff andrapen harrn. Un nu lees ik in uns Blatt, dat de Skulpturenpark Seekamp to nieges Leven weckt woorn is. De Dornröschenslaap weer to Enn. Dat weer en gode Nahricht, un wi sünd recht froh doröver. — De Websteed vun'n Skulpturenpark köönt Se hier ankieken, un wat de Hans-Kock-Stiftung in Tokumst mit den Skulpturenpark vörhett, beschrievt de Lübecker Narichten hier. En Besöök lohnt, wiss ok in Tokumst un sünnerlich bi sacht-schönes Sommerweder!


De schöne Landschap seggt Adjüs


15.7.2015

trüch


na baven


na't Flack

na de Startsiet