Schäfchenwolken, Bild Zacke/wikimedia commons
1. Wulkenleed
An sünnig Dagen
över mi
Zuckerwattewulken
flüchtig Lagen
krüselt
fine witte Schaapkes
de up blaue Meden
weiden tüsken
Hemel un Eer
ik lüster
hör lies
Wulkenharpgeluud
un een
parrelfarven
Smüsterlachen
geev de Hemel mi
Cumulus
2. Wulkenleed
Witte Luchtkuppels
fallen utnanner
Wulkenstraaten
laten sük sehn
de to'n Hemel föhren
Luchtslössen boo ik mi
nu in dat Blau
mit Toorntjes un Fensters
flüchtig
verannerlik
in elke Minüte
Thermik draagst de Adler
anhoog
up disse Wulken
kunn keeneen Gott husen
un later blinkt
blauachtig
in weeke Tweedüstern
de Maancorona
Regenwulken, Foto Simon Eugster/wikimedia commons
3. Wulkenleed
Ik weet neet mehr
waar de Sünne is
umkleed
de Hemelsblick
blauachtig dat Dunkelgrau
achter utfranst
Wulkensleepen
klautern Regengeister
umhoog
tüsken dunker Bargen
lüchten
een bi een
blau
Hemelplöttjes
Cirrus-Wulken, Wikimedia commons
4. Wulkenleed
Inslapen
up dickbuukd
witte Wulkenbulsters
treden in
Wulkenstappen
de to'n Hemel föhren
Skywalker
anhoog de Sünne
un Frigga spinnt
lange Wulkennetten
kantjet mit fine Ranken
Zirruswulken
lechtwitte Iesflieren
de daarvan sweven
wankelmödig
as Wulken wesen
Wulken in de Avendsünn, wikimedia commons
5. Wulkenleed
Watteschuller tegen
Watteschuller
een flockerg Schicht
bovenup de Hemel
Bargen daartüsken
besünner inpackt
in Dookslier
Heimat van de Adler
un Drakenfleger
Stimmen
neet to hören
un langsaam
dwirreln Wulken vörbi
as gleunig Iesjuwelen
in't Sünnerunnergahn
|