Dat is nu al mehr as 20 Johren her, as op de Weid vun Jocki un Marion en Storkennest opstellt worrn is. In över fief Meter Hööcht hett dat Nest nu al siet en poor Johren true Duermeders. „Jedet Johr kummt siet de Tiet dat glieke Störkenpoor na uns un lett nich to, dat sik hier en anner Paar daallett“, vertellt Jocki. Siene Fro Marion lacht un stimmt to, denn se schrifft in en Book allns op, wat se beluern deit, welke Stork toerst ankummt, wo veel Eier de Störkin later leggt un wo veel Lüttje utkaamt un groot ward un sik later ok op den Weg na'n Süden vun Spanien maakt.

Ja, dat weet se nu, dat de sik in'n Winter in Süd-Spanien opholt un nich, so as fröher annahmen, na Afrika fleegt. De Störkenöllern hebbt nämli vör twee Johren en Ring anbrocht kregen, de vun de Vogelschuulstatschoon utmaakt warden kann.

Dormit Marion ok jümmer de richtige Tall vun Eier in ehr Book opschrieven kann, klattert Jocki jedet Johr mit en Ledder den Mast hoch un kickt in dat Nest. Dit Johr weer he doch bannig överrascht, denn fief Eier harr he woll al fakener tellt – aver dat ok al utkaamt, dat harr he bither noch nich beleevt, un deswegen freit beide sik ganz afsünnerlich. Ut de Eier sünd in de Twüschentiet fief halvstarke Störkenkinner worrn — un all goot toweeg!

Marion un Jocki sitt nu faken avends op jümehr Storkenbank un kiekt na de Störk. Nu, wo doch bald de Floog in den Süden bevörsteiht, sünd de Öllern beide iverig dorbi, de Lütten düchtig mit Foder to versorgen; un de Nawuss wiest jüm mit ehr Öven, dat se ok bald so wiet sünd, sik op de grote Reis optomaken. Denn ward Marion in ehr Book woll för dit Johr ehren letzten Indrag maken: „All sünd gesund afflogen.“ Un dorbi hett se denn de Höpen, dat neegst Johr tominnst dat Öllernpaar den Weg na jüm trüchfind.

---

Fotos: Angelika Cordes

---