 |
|
van Ludgerd Lüske Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Firefly dö sienen Lander Blawe Spauk 1 in dat Mare Crisium (Geföhrlicket Meer) affsetten. Teihn mitbröchte Wätenschkup-Apparaote van dei NASA kömen so up den Maondbodden. För dei Maond-Wätenschkup schäöllt dei wichtige Daoten faoten. Dorbi spält dat Regolith-Verhollen, dei Maond-Binnen-Struktur un noch mehr Saoken eine Rulle. Dei neiesten Maond-Speegels (NGLR)
Dei neie Ort van Maond-Speegels (NGLR) kann mit Erd-Laser den Affstand tüschken Ern un Maond orig nau mäten. Dei NGLR schall dei orig korten Laserpulse van dei Affstand-Mät-Maond-Laser-Warte (LLROs) trügge straohlen. Dorbi mätt man dei Lecht-Looptied tüschken Ern un Maond. Mit dei ollen Apollo-Speegels, dei al 1969 van dei Apollo-11-Mission op den Maond trüchlaoten wüürn, finnt man dei Maond-Koortinaoten, dei man vandaoge noch bruukt. NGLR kann dei Apollo-Daoten mit ein Submillimeter-Mäten dütlick verbätern. Dat helpet däget bi dat taukaomen Artemis-Programm. För ein Lang-Ünnerseuken van dei Maond-Physik, Astro-Physik
un Kosmologie winnt man so ein gauen Bidrag.
Plaont sünd ok Mät-Aktionen mit den Kubus-Speegel in einen besünneren Kassen un mit eine eigen Bau-Ort. Mit orig naue Affstände will man den Maond-Karn-Buuk, elastischke Tieden, Maond-Tieden-Riewen, Riewen an dei Karn/Mantel-Grenze, freiet physikaolischket Wackeln, Maond-Korten-Upnaohmen un Gravito-Magnetismus utforschken. Straohlenfaste Computeranlaoge (RadPC)
RadPC schall naue Straohlungs-Informationen äöwer dei Mond-Lande-Stä finnen, wobi man mehr äöwer dei ioniseiern Straohlung wäten will. Dei Box mutt straohlenfast sien, wieldat dei Maond ja kein Atmosphäär hett un dei kosmische Straohlung dor orrig hooch is. Dat Straohlenfaste Computer-System (RadPC) is dat Vörwiesen van disse neie Computer-Technologie. RadPC hätt eine Riege van Inrichtungen tau'n Minnern van Fählers. So verhaolt sick dat System van einkelne Fähler-Riegen (SEEs), dei van dei ioniseiern Straohlung herkaomt. Dei Reparatur-Aktionen maokt eine kommerzielle feldprogrammeierbore integreierte Schaltung (FPGA). So krigg man ein passen Maot för dei Vull-Ioniseierungs-Dosis (TID), wobi man likers dei Leistung un dat Energie-Utnützen insetten kann. Dat RadPC-System hätt eine Computer-Technologie, up dei ein grootet Test-Programm löpp. Dortau kaomt noch Mät-Apparaote för dei Computer-Gesundheit. Drei Straohlen-Dosimeter, dei unnerscheidlick empfindlick warket, sünd uck an Bord. Dei schäöllt mehr Informationen äöwer den ümgäben Ruum faoten und mit dei Leistung van RadPC verglieken und naue Straohlungs-Daoten äöwer dei Maond-Lande-Stä mäten. Faoter van dat Regolith-Kläwen (RAC)
Dat RAC schall rutfinnen, wo Maond-Regolith an unnerscheidliket Materiaol kläwt, dat an einen Maond-Dag dormit tausaome kummp. Man will an Ruum-Fohrtüge, Ruum-Anzüge un dei Maond-Waohnungen dat Affschüern minnern. Eine Stoff-Fang-Schiewe, Warmte-Kontroll-Farwe, Kapton (Polyimide) un Titan un 30 annere Proben geef dei NASA dorför an dei Industrie.
Van 15 Proben giff et twei glieke Sätze, dei in twei Räöe sittet, dei man mit "A" un "B" teiken dö. Jedet Rad dreiht aale 24 Stünnen för eine Upnaohme vör eine Kamera-Linse. Dat "B"-Rad, dat man eiers nao ein poor Stünnen nao dei Maond-Landung freilegg, bruukt man at eine Kontrolle för Transport-Effekte up dat "A"-Rad. Dit ligg bi dei heile Mission frei. RAC schall uck dei Taunaohmen faoten, dei dör Landungen un staodige naokaomen Landungen taustanne kaomt. RAC schall uck IR-, UV- un Temperatur-Daoten faoten tau'n Verbätern van dat Wätenschup-Verkloren ut dei 5,1 MP-Biller. Dei Bedriew stüert sick sülwes, dorbi kann aower dei Bodden-Mannschkup bi Notlaogen ingriepen. Dei Einkel-Deile bi dit Experiment kaomt van dat MISSE-Experiment up dei ISS.
Intressante Links:
|
|
SO-Platt: Ludgerd Lüske 8.10.2025 |
