Auf der Mauer, auf der Lauer...
...liggt de lütte Füerwanz

vun Antje Heßler

Sehn heff ik so'n rotswart Füerwanz ok al mal bi uns to Huus in'n Goorn. Dat weer aver blots en enkelt Deert. Dor weern mi al de smucken Teken up den Rüüch vun de Wanz upfullen. Düsse Füerwanz — ok Füerkäver un Franzosenkäver nöömt — höört to de Familie vun de Füerwanzen. Se hett rein gor nix mit de Bettwanz to doon! Up de besinnt sik seker noch männicheen vun uns. De Bettwanz höört to de Familie vun de Plattwanzen. Beide Oorten sünd Schnabelkerfe.

Ok de Ritterwanz, de de Füerwanz to'n verwesseln liek süht, hett nix mit de Bettwanz to doon. De Ritterwanz is dütt Johr to'n Insekt vun dat Johr 2007 utsöcht woorn.

As wi vör twee Weken up Reisen weern, bün ik enen groten Hupen Füerwanzen wies worrn. Se seten dicht an dicht, meist upeenanner an en Steenwand. An den Dag schien in düssen Sommer mal de Sünn. Se harr de Steen schöön warm maakt. Man kunn richtig marken, dat de Deerten de Warms vun de Steen geern harrn. De witte Wand harr dörch de Deerten en rotswart Muster kregen. Lütte un grote Wanzen krabbeln dörcheenanner. Eenige vun de Deerten lepen to tweet. De en harr den Kopp na de en Siet un de anner genau na de anner Siet. Mit ehr Achterdeel weern se dicht bieenanner. Dat sehg meist ut, as weern se tosamen wussen. En vun de beiden müss ümmer trüchwarts lopen. In düsse Oort güngen sogor de Wanzenpoore över de Straat. Sull dat en Bruutpoor ween?

To Huus heff ik mi denn glieks klook maakt, wat dat allens up sik harr. Dor stünn in mien Book, dat de Füerwanzen geern Sellschop hebbt, se möögt nich alleen ween. Leven doot se vun den Saft vun Samen un Planten. Den Saft vun den Linnen- un Malvensamen möögt se besünners geern. In Winter verkruupt se sik in Muerritzen. Sobald dat warm warrt, in April-Mai, poort sik de Füürwanzen. Bi de Poorung klattert dat Männchen up den Rüüch vun dat Wiefken. Dorna rutscht he an de Siet hindaal. Mit dat Achterdeel blievt de beiden aver noch wieder tohoop. Un dat heff ik allens mit ankieken kunnt!

Bit to hunnert Eier leggt de Füerwanzen in lütte utgraavte Eerdlöcker oder verdrögtes Loov af. Ut de Eier kruupt Larven, de Nymphen nöömt warrt. De sünd ok rot un hebbt eenfache swarte Punkte up den Rüüch. De smucken swarten Teken fehlt noch. Fiefmal mööt se ehr Huut wesseln, bit se utwussen un so bit 12 mm groot sünd. Afsünnerlich: De Levenssaft vun de Füerwanz is gröön — so as dat gröne Bloot vun de Vulkanier in't "Ruumschipp Enterprise"

Düsse lütten smucken Füerwanzen bedüüd ganz un gor keen Gefohr för de Natuur un uns Minschen. Wi bruukt keen Bang to hebben. Ok wenn dat mitünner bannig veel dorvun gifft. In Gegendeel, mit ehr stark rotswart Farv maakt se uns de Natuur orrig wat bunter. För de Wetenschap sünd düsse lütten Deerten ok bannig wichtig. Man versöcht Medizin ut de Füerwanzen to maken. Also is de Füerwanz en rundüm sympathisches Deert!