van Ludgerd Lüske

Nao Deil 4

---

 

Gaia bi den Test tau'n Utklappen van dat Sünnensägel

"Gaia steiht för einen Droom, nao den dei Astronomen all siet dei Antike seuket, nauer säggt siet dat baohnbräken Observeiern van den griechieschken Astromom Hipparchos, dei mit blote Oogen un einfache Geometrie dei Positionen van bold duusend Sterne taueinanner katalogiseierde. Mehr as 2000 Johre läöter werd Gaia nich blots einen stelloren Bestand in ein bitlang unbekannt nauet Maot upnähmen, sünners dorbi wiss uck neie Asteroiden, Planeten un starven Sterne finnen", so sägg Alvaro Giménez, ESA-Direktor för Wätenschkup un robotischke Exploration.

---

---

Dör dat Verglieken van dei upnaohmen Daoten bi dat fäökener wedderhaolte Hemmelsdörmustern werd Gaia uck teihnduusende Supernovas finnen, dit üppste explosive Wark in den Doodeskampf van dei grooten Sterne. Wedderkaomen lüttke Positionsännerungen van Sterne käönt dorbi ein Teiken för ehre ümloopen Planeten wän, dei käönt dorbi den Stern van dei eine Siete nao dei annere trecken.

De Reedschapen van Gaia. Bild: ESA

Döräöwer weg räket man dormit, dat Gaia neie Asteroiden in use Sünnensystem finnt, dei Ümloopbaohnen van all bekannte Asteroiden nauer utmäten dait un Einstein siene beneumte Relativitätstheorie nauer unnerseuken kann.

200.000 CDs kunn man as einen 240 m hogen Staopel upstellen, Vergliek mit dat Woolworth-Building (241 m hoch)

Nao fief Johre werd dat Daotenarchiv mehr as ein Pentabyte (= eine Million Gigabyte) groot wän, dat wörd up bold 200.000 DVDs passen (240 m hoch as Staopel). Mit dat Bewarken un dei Anaolyse werd sick dat Konsortium tau'n Verwarken un Anaolyseiern van dei Gaia-Daoten (DPAC) befaoten, dat hätt denn mehr as 400 Mitwarkers van dei äöwer heel Europa verdeilten Wätenschkup-Institute unner sick.

"Hipparchos kunn 120.000 Sterne katalogiseiern, Gaia werd aower bold 10.000 maol so väle mit eine 40 maol gröttere Präzision upnähmen", verklorde dei ESA-Projektforschker för Gaia, Timo Prusti. "Tausaome mit teihnduusende annere Hemmelsobjekte käönt wi mit dissen Daotenfundus ein neiet Bild van use kosmischke Naoberschkup un dei Geschichte van ehr Entstaohn dorstellen. Dat helpet us bi dat Utforschken van dei grundleggen Eigenorten van dat Sünnensystem un dei Melkstraoten un van use Position in dat All."

Dei Melkstraot

"Nao mehrjöhrige harte Arbeit un wägen dei Utduur van aale bi disse Mission mitwarken Lüe frait wi us nu, dat use Forschkungsmaschine up einen gauen Weg nao ehren Insatzort is. So käönt wi mit dei ehrwürdige europäischke Tradition van dat Sternenkorteiern wiedermaoken un neiet Lecht in dei Düsterkeit van dei Geschichte äöwer dat Entstaohn van dei Melkstraoten bringen", sä dei ESA-Projektleiter för Gaia, Giuseppe Sarri, noch dortau.

Plaont un bawed wörd Gaia van Astrium, dat Kernteam dorvan verdeilde sick up dei Unnernähmensfiliaolen in Frankriek, Dütschland un Grootbritannien.

Gaia schall dei bit nu hen naueste Korte van use Melkstraoten upnähmen