Ginkgo vör den Storm

Ginkgoblatt

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

 

Ik bün en Ginkgoblatt. De Harvststorm hett mi vun mien Boom, den Ginkgoboom reten! De Boom warrd as "Lebendes Fossil" betekend. He is de eenzig Boom vun Ginkgogales, en utstorven Samenplantengrupp, de överleevt hett. Sien Tohuus is China, un he kann recht old warrn.


Vör den Storm

Egentlich wullen wi Gingkobläder alltohoop to'n groten Harvstball flegen. Aver dor hett uns de Storm Christian ganz eenfach enen dicken Strich dörch maakt. Un wi harrn uns all up den groten Ball freut!

Meist all mien Verwandten sünd in alle veer Hevensrichten wegflagen. Ik bün hier teemlich alleen ünner unsen Boom to'n Lingen kamen. Wo de annern al afbleven sünd, weet ik nich. Wi harrn al uns nieges Harvstkleed utsöcht. Goldgeel weer de Faarv. Seker wöörn wi dormit enen Pries winnen. Aver denn keem de Storm Christian.


Storm Krischan


Krischan treckt as verdull an de Bläder


Och du je, dor liggt mien Verwandten op den Diek!


Hierhin hett dat mi verslaan

Mit depes Hulen keem he ansuust. Höör sik an as en Orgel. Glieks reet he de ersten Bläder vun den Boom. De segeln up de Eer un lannen in'n Nawers Goorn. Welk bleven up den lütten Diek ünner den Boom liggen un decken em mit en geel Deek to. Ik kunn mi noch fasthollen. Aver denn haal Christian deep Luft, stemm de Arms in beide Sieden un wies uns, wat he kunn. Dor help keen Fasthollen mehr. Wi wirbeln alltohoop dörch de Luft. Küseln in Kring ümeenanner un fullen denn hindaal. Mit de neegst Windbö güng de Reis aver noch wieder. Keeneen wüss wohin. Ik harr Glück, ik lann in'n Windschadden vun de Heck up de Eer. Dor heff ik mi denn wat verhaalt.


Tovöör — un achterna...


So süht dat nu ut

As ik mi na'n Stoot unsen Boom ankeekt, kemen mi meist de Tranen. Vör twee Daag prahl he noch mit uns un sien goldgeel Faarv! He dreih un wenn sik ünner den blagen Heven in de warme Oktobersünn. Keen annern Boom weer so smuck! Un nu harr he meist keen Blatt mehr. Bit op en poor, de sik noch krampfhaft an den Boom klammern. Blots de kahlen Telgen strecken sik in den düstern Heven! Mitünner schick de Sünn noch en poor Strahlen dörch en Wulkenlock. De kiekt sik mit grote Ogen den Stormschaden an.


Ok ahn Bläder kann dat schöön utsehn


Dor weern welk vun uns sogoor noch gröön

Wat nu ut uns un mien Sipp warrd, weet keeneen. Unsen Harvstball köönt wi vergeten. Seker landt wi mit den Kehrbessen up en groten Müllhupen.


Goethes Gedicht över't Ginkgoblatt hett Cord Denker op Platt översett.
3.11.2013


na baven