vun Antje Heßler

In dat Winterhalfjohr, wenn de Bööm kahl sünd, kann man se wedder besünners goot utmaken: De Hexen-bessen an den Barkenboom in den Godewindpark. De hängt dor al vele Johrn un ümmer wedder fallt se mi in't Oog. Mi dücht, dütt Johr sünd se besünners groot.

Hexenbessen in'n Winter

Hexenbessen in'n Oktober

De Hexenbessen hebbt mi wedder an enen Spazeergang mit uns Kinner dörch den Park erinnert. Dat liggt al en ganzen Stoot torüch un weer in de Harvsttiet. "Mama, kiek mal", mell sik de Deern, "wat is dat dor baben in den Barkenboom?" All keken wi na baven, kunnen aver dörch de Bläder nix utmaken. Denn wöör mien Mann so'n Büschel ut luder lütte Twiege wies. Sull dat villicht en Mistel sien? Oder weer dat en Kreihennest?

Hexenbessen an'n Karpendiek

En Mistel hier an den Barkenboom? Dat kunn ik nich glöven. De Twiege vun en Mistel sünd doch gröön, un de hier seht ut as verdröögt Buschwark. En Kreihennest weer dat ok nich. Dat weer seker en Hexenbessen!

Nu güng de Frageree aver los. Wat is en Hexenbessen?? Hett dat mit en Hex to doon?? Ik heff versöcht, dat de Kinner to verkloorn. Se müssen mi ja glöven. De Hexenbessen hüng so hoch, anfaten un nip un nau bekieken kunnen wi em nich. Aver woto geev dat Böker. Ik heff denn versöcht mien Kinner dat to verkloorn.

Hexenbessen-Baby (lütte Hexenbessen)

Hexenbessen oder Donnerbüsch weer kugelig un kröpelig wussen Buschwark in de Kronen vun de Barkenbööm. Se entstaht dörch en Oort Schlauchpilz. De maakt baben up de Barkentwiegen lüürlütte Schläuche. De verhinnert dat natüürlich Wassen vun de Bark. De Pilz drifft de Bark ümmer wedder an, niege Twiege to billen. Toeerst sünd dat blots lütte Büschel. De seht meist enen Bessen ut Barkentwiege liek. De warrt aver ümmer gröter un gröter. Dat kümmt sotoseggen to en Sucht. An de befullen Stellen kaamt ümmer wedder niege lütte Twiege. Ut de lütten Büschel warrt richtig grote Klumpen. In de Kroon vun en Barkenboom köönt sik eenige Hexenbessen ansiedeln. Dat is för den Boom en richtige Krankheit un hinnert em an't gesunde Wassen. He is meist so'n beten verhext. Un dütt Gebilde, dat utsüht as en groot Geschwüür, heet Hexenbessen.

Dalfulln Hexenbessen

So richtig vun dicht bi harr ik ok noch kenen Hexenbessen sehn. Dor keem mi vör dree Johr en Storm to Hölp. He hett en vun de groten Hexenbessen ganz eenfach daalpust. Un nu leeg he dor up den Rasen. Dor sehg he noch veel gröter ut as an den Boom. Ik wull em ümdreihn. Dat kunn ik aver nich, he weer ganz eenfach to groot un to swoor.

Nu kunn ik aver genau faststellen, dat de Bessen sik ut luder lütte Twiegen tosamensetten de. Dorto harr sik noch up dat böbere Enn Moos ansiedelt.

Detail

Ünnersiet

Moos- un Pilzbefall an'n Hexenbessen

Dat allens möök em so swoor. Dor heff ik eerst begrepen, wat de arme Barkenboom nu al siet vele Johr'n allens drägen mutt. Ümmer wedder wenn ik dor vörbi kaam kiek ik na den Boom. Wolang he dat wull noch uthöllt?