Hier mutt de Docht noch beten trimmt warrn

Honnigkarsen geten

vun Thomas Seemann


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Wenn Se enen Imker kennt un de Se sien lerrige Honnigwaben schenkt, denn is nu de Tied, echte egen Wasskarsen för den Advent to geten! De Duft is nich to beschrieven, de maakt ok de Dannenbööm Konkurrenz. Dat Karsengeten kann jedeen, de an Honnigwaven rankümmt. Hier kümmt en Rezept.

Toeerst bruukt Se düsse Materialien, dat Se anfangen köönt:

  • Holtstäbchen
  • Herdplatt
  • Strumpfhose
  • lerrige Konservendoos
  • Spachtel
  • Rohmaterial Wass von'n Imker
  • Dochte
  • Karsenformen
  • Emmer

De Karsenformen mööt hitt Wachs uthollen, dorüm köönt Se nich eenfach Plastikbeker nehmen. Dat best Material is Silikonkautschuk. Se kriegt dat in'n Bumarkt, in'n Bastelmarkt orr in't Internet. Ok Dochte kannst dor kriegen. Wo dick de Docht is, dorvun hangt ok af, wo fix de Kars wegbrennt. Schohsenkel sünd nich so gode Dochte!


Hier sünd de Heldinnen, de dat Wass maakt!

Un hier kümmt de Ünnerwiesen:

Smölten

  • Toeerst maakt Se op de Heerdplatt en Waterbad hitt.
  • In dat Waterbad warrt de Konservenbüss sett, vull mit de braken Wassstücken.
  • Nu warrt dat Ganze so lange hitt maakt, bit dat braken Wass dörchgahns fleten is — flietig ümröhren mit dat Holtstäbchen!


Dat rohe Wass. De Wabenstruktur is noch good to sehn


Hier steiht de Metallpott in't Waterbad


De reinmaakte Wasskoken na dat Filtern (süh neegsten Schritt)

Filtern un Reinmaken

  • Nu nehmt Se den Emmer — dat kann ok en Schale sien — un dor kümmt en lütte Schicht kakend Water rin.
  • Spannt Se de Strumpfhose över den Emmer.
  • Geet Se dat fleten Wass vörsichtig dörch de Strumpfhose in den Emmer.
  • Nehmt Se de Stumpfhose af un laat Se dat Wass in den Emmer koolt warrn.
  • Drückt Se den kolen Wasskoken ut den Emmer un kratzt Se mit den Spachtel de bövelste Schicht af, in de sik de Schwimmstoffe afsett hebbt.
  • Düsse Wasskoken is de Utgangsstoff för de Karsen.


Stop, nich naschen! Dat is keen Karamell! Dat is reinmaaktes Wass!


Düt Wass warrt nu wedder smolten

Nieg Smölten un Geten

  • Dat reinmaakte Wass in Stücken slaan orr breken.
  • De Stücken köönt Se eenfach so in en Pott op de Herdplatt smölten. Rühren nich vergeten!
  • Stellt Se de Karsenformen paraat un klemmt Se den Docht twüschen twee Holtstäbchen doröver. De Holtstäbchen tüdert Se an de Ennen mit Gummibänner fast, dat de Docht nich rutflutscht.
  • Nu langsam un vörsichtig dat Wass ingeten.
  • Gründlich koolt warrn laten, op't best över Nacht stahn laten!


De Karsenformen mit Dochte vör dat Geten.
Twee fertige Karsen liegt al achtern.

Wenn Se düsse Karsen ut de Foorm nehmt, föhlt Se sik villicht en beten as en Glockengeter. Aver de Duft, de Duft na Honnig, den kannst nich beschrieven.

Schönen Advent!


Ok Rundformen un Teelichte sünd mööglich!


26.11.2017


na baven