vun Behrend Böckmann

Fauderstunn'

In't Vagelhus vör't Finster,
Dor geiht dat rin un rut,
Dor söcht sik hier bi Tieden
Por gaude Happen ut.

Wat nüdlich daun sei fleigen
Dat freut mi würklich sihr
Sei fleigen un sei picken,
Dat warden ümmer mihr.

Ik kiek vergnäucht nå buten,
As dat an't Finster klirrt
Ein Meisch wull mi besäuken,
Sei harr sik wull verirrt.

Sei hett sik fix besunnen
Un flücht tau't Fauder hen,
Sei flücht as all die annern,
Mien Wunnern nimmt kein Enn'.

Ruuchfrostdrom

Dat geiht kein Wind,
Dei Luft steiht still,
Dei Böm hemm' Rauh
Bi disse Küll.

Kein Stiern tau seihn,
Dei Häben dicht,
Denn œwer uns
Väl Näwel licht.

Hei höllt sik nich —
Un denk di mål,
As Glitzeries
Kümmt hei hendål.

Up jeden Twiech
Is Zucker streut,
Uns Ogen seihn
Mit grote Freud:

Zuckerfransen
An jeden Bom,
Son'n witte Welt,
Wat för ein Drom!

Hartung — Witt un Gäl

Dei Schneiros' is sik ümmer wiss,
Dat's dei Allerierste is,
Dat sei so as alle Johr,
Vör dei Winterblaum is dor.

Sei gifft bannig dormit an,
Dat's ok in'n Düstern lüchten kann,
Denn ehr Witt lücht as bekannt
För Wohrheit, Unschuld un Verstand.

Dei schneiwitten Bläuden sünd
So reigen as dat Christuskind,
Un sünd dorher in't ganze Land
Ok as Christros' sihr bekannt.

Dei Winterblaum bläuht dicht an dicht
Up dei Wisch bi Sünnenlicht,
Doch wenn denn sachtens kümmt dei Nacht
Is vörbi dei gäle Pracht.

An'n annern Dach bi Sünnenschien
Lüchten Bläuden wedder fien,
Ehr Gäl nich mihr as afgünnsch gellt
In ein so güllen Winterwelt.

Nå Witt un Gäl mank Bläder gräun
Warden anner Blaumen bläuh'n
Un't Minschenhart, dat freut sik sihr,
Wenn dat Gräun ward ümmer mihr.

Gäle Winterblaumen

Dusend lütte Winterblaumen
Ståh'n up mien Wischenstück,
Lüchten so as dusend Sünnen,
Bringen ierste Immen Glück.

Dusend gäle Winterblaumen
Wiesen mi ehr Gesicht,
Kieken in denn blågen Häben,
Säuken dor Sünnenlicht.

Dusend säute Winterblaumen
Holl'n sik ümmer pråt,
Setten an dörch Wind un Immen
Dusendfach dei niege Saat.

Saatküürns von mien Winterblaumen
Verdeil ik hier un dor,
Dat noch väl mihr lütte Sünnen
lüchten in 't neechste Johr!