 |
|
van Ludgerd Lüske
Wenn dei Sonde in den Weltruum ankaomen is, giff et ein Herutföddern: Man mutt disse Speegels sowiet henkriegen, dat sei sich pass instellt up wiet wegliggen Melkstraotens (Galaxien). Lüttke Stellmotoren sünd dat Middel. Dormit krigg man den besten Brennpunkt hen. Dei Hauptspeegel-Segmente un dei Fangspeegel werd van lüttke Stellmotoren röögt, dei an dei Achtersiete van jedet Speegeldeil sittet. Dei Hauptspeegelsegmente häbbt uck einen Stellmotor in dei Midde, dei den Speegel pass bögt. Dei Tertiärspeegel behollt dorbi seine Laoge. — Hier up youtube gifft't dat in't Video!
Dei licht böögte (konkav parabolischke) Hauptspeegel reflekteiert einen fokusseierten Lechtstraohl up den runden Fangspeegel. Dei Fangspeegel is nao buten hen böögt (konvex hyperplischk), un dei reflekteiert einen noch fokusseierten Lechtstraohl nao unnen dör dei Midde van den Hauptspeegel. Bi Draokenoge sitt dit AOS (Aft Optics Subsystem) in dei Midde van den Hauptspeegel. Dor binnen sünd dei Tertiär- un dei Fienutrichtspeegel, dei dat Lecht wieder fokusseiert un up dei Wätenschkup-Instrumente leitet. Dei Tertiärspeegel minimeiert uck noch dei optischken Aberrationen.
Lee Feinberg — hei hätt dat Leit äöwer dat Optischke Teleskopelement van Draokenoge — verkloort: "Dei Utrichtung van dei Hauptspeegel-Segmente, dei warket as ein einkeln grooten Speegel, bedütt, dat jede Speegel up 1/10000 van dei Dickte van ein Menschen-Hoor utrichtet is." Noch wunnerlicker is: Dei Ingenieure un Wätenschkup-Lüe, dei an dat Draokenoge-Teleskop warket, mössen disse Technik worhaft nei rutfinnen. Sei häbbt dat henkrägen. Opneegst warrt wi dat an dei Biller van Webb sehn.
Hier giff et mehr: The Story of Webb | Flickr Originaol-Artikel: Webb/NASA |
|
10.7.2022 |
