Draokenoge, dat Weltruumteleskop:
MIRI un Spitzer — Bildvergliek

van Ludgerd Lüske


Dei eiersten Biller van James Webb un sien "Draokenoge" sünd nu endlich un wohraftig indraopen un dei hele Welt is begeistert. Dei Biller sünd allns, wat wi haopet häbbt. Wi seht dei brillante Qualität van dei Upnaohmen; hier wieset dei NASA ein lüttke Galerie. Wat dat för ein Qualitätssprung in dei Biller is, wüllt wi hier wiesen in den Vergliek van't Draokenoge mit ein konventionelles Teleskop.


Draokenooge-Teleskop (NASA)

Draokenooge is mit aale veier Wätenschkup-Instrumente utrichtet, wat ein ölleret technischket Bild wiest. Dorbi süht man dat vulle Sichtfeld van dat Observatorium.

Nu kiekt wi us dat glieke Bild nauer an un nähmt dorbi dat köllste Instrument: dat MIRI (Mid-Infrared Instrument).

Dit MIRI-Testbild (upnaohmen bi 7,7 Mikrometer) wiest ein Deil van dei Groote Magellanschke Wulke. Disse lüttke Satellitengalaxie van dei Melkstraoten hätt ein dichtet Sternfeld. Hiermit kann man dei Leistung van Draokenooge utprobeiern.


MIRI un Spitzer — Bildvergliek. Bild-Daoten: ESA — Webb

Hier verglick man eine MIRI-Naohupnaohme mit ein ölleret Bild, dat eine Infrarot-Feld-Kamera van dat Spitzer-Weltruumteleskop bi 8,0 Mikrometer upnöhm. Dat utmusterte Spitzerteleskop was dat eierste Observatorium, dat hochuplööste Biller van dat naohe un middel Infrarot-Universum mök.

Dat Draokenoge wiest us dör einen dütlick grötteren Hauptspeegel un bätere Detektoren den Infrarot-Häwen mit eine bätere Klorheit. So kann man noch mehr Saoken in den Weltruum finnen. Hier wiest MIRI dat interstellore Gas in orig väle Einkeldeile. Man süht hier uck dei Emissionen van polyzyklischke aromaotischke Käöhlenwaoterstoffe (PAK). Dat sünd Moleküle ut Käöhlenstoff un Waoterstoff in wisse Krings. Dei spält eine wichtige Rulle in dei Warmte-Bilanz un dei Chemie van interstellore Gase. Wenn Draokenoge mit dat Wätenschkup-Wark anfang, käönt dei Astronomen mit MIRI dei Geburt van Sterne un protoplanetore Systeme studeiern.


Naphthalin — Molekül-Upbau


Anthracen — Molekül-Upbau

PAKs sünd meist neutraole, unpolore Faststoffe. Väle dorvan wiest eine Fluoreszenz. PAKs löst sick blots minne in Waoter; mit eine taunähmen Taohl van kondenseierten Krings nähmt Flüchtigkeit un Löslichkeit aff. Blots ein poor PAK-Moleküle werd pass herstellt un werd as End- off Tüschkenprodukt bruukt. Naphthalin bruuktman in dei chemischke Industrie as Tüschkenprodukt meist för Azofarwen. Anthracen is ein Tüschkenprodukt bi dei Farwen- un Plastikherstellung.


Originaol-Artikel: ESA/Webb
SO-Platt: Ludgerd Lüske


12.7.2022


na baven