Dat Kruut för'n Harvstmaand:

Gänsefingerkruut

vun Anke Nissen

Potentilla anserina — Familie Rosaceae

Anner Namen:

Gänsefingerkruut,
Anserine, Dreckkraut, Echtes Gänsekraut, Fingerkraut, Gänsekraut, Gänserich, Gänsert, Gänseweiß, Gänsewiß, Gänsegarbe, Ganspratzen, Gensing, Grensel, Grensing, Handblatt, Kammetkraut, Krampfkraut, Martinshand, Maukenkraut, Saukraut, Säulkraut, Sauringel, Silberkraut, Stierli-Chrut, Wiederrick.

Sammelt warrt:

Kruut (Herba Potentilaae anserinae)

Warrt bruukt:
  • as Gerbstoffdroge
  • bi Katarrh vun Magen un Darm

So warrt't anwennt:

  • 1 Eetlöpel dröög Kruut
  • mit 1 Tass kaken Water övergeten.
  • 10 Minuten trecken laten.

"De eerst Deel vun mienen Naam löppt up'n Buurnhoff.
Ok de Liesel in Göttingen hett wat mit dit Wesen to doon.
De tweet Deel vun mienen Naam is an elkeen Hand.
Un de dritte Deel vun mienen Namen seggt, dat ik en K...t bün,
man nee, dat verraadt ik nich, dat weet ji bestimmt alleen."

So hett disse Plant vör Johren in mienen Adventskalender fraagt. Un all hebbt dat wüßt. Se sullen dat Gänsefingerkruut raden.

Gänsefingerkruut kennt wi all. Dat wasst as Wildkruut (fröher sään wi Unkruut) överall, an'n Rand vun Weeg, an 't Över vun Fluss un Beken up Feller un Wischen, up "Gänseweiden".

Dat Kruut wörr fröher geern junge Göös to 'n Freten geven, villicht dat dor de Naam herkümmt.

Dat Kruut is en heimisch Plant. In de Klooster-Heilkund is nich veel dorvun to finnen. Hildegard vun Bingen snackt blots as "Unkruut" von dat Gänsefingerkruut, en Heilkraft kennt se nich vun dit Kruut.

Man de ollen Germanen hebbt dat Kruut al kennt. Se hebbt wohl in Hungertieden de Wörtel eten.
Tabernaemontanus schrifft 1631:

"wir wollen Gott dem Herrn darumb danken, daß er uns die Tugendt und Kräfft dieses Krauts hat offenbaret."

Wi leest dor,

  • dat ut de Plant en Gänserichkruut-Water maakt wörr un ok en Gänserichblomen-Water un sogoor en Gänserichblomen-Zucker;
  • wi leest ok, dat Gänserich in roden Wien un oll Beer gesotten un denn as Plaaster upleggt wörr, üm Hartbesweer un Watersucht to heilen un ,,die Hitz" rut to drieven.

Gänsefingerkruut gell jümmers as Fruunkruut.

Bruken kann man dit Kruut

  • gegen krampfordig Besweer bi Durchfall,
  • gegen krampfordig Besweer bi de Menstruation vun Fruun,
  • ok to'n Spölen bi Entzünden vun de Sliemhuut in Mund un Rachen.

 

 

Teemischen
Tee, de Water rut drifft un Menstruationsbesweer linnert

  • 8 g Gänsefingerkruut
  • 30 g Kamillenblöden
  • 30 g Brennettelkruut
  • 8 g Birkenbläder
  • 24 g Fenchelsamen (wegen den aromatisch Smack)


  • 2 uphümpelt Teelöpel vull vun disse Teemischen in'n Mörser tweidrücken,
  • mit 1 Tass kaken Water övergeten,
  • todecken,
  • 10 Minuten trecken laten,
  • afseihen.
  • 4 bet 5 mal an'n Dag en Tass vun dissen Tee drinken. Jümmers frisch upbrühen!


Tee, de Krämpfe lööst

  • 20 g Gänsefingerkruut
  • 20 g Kamillenblöden
  • 20 g Schafgarbenblöden
  • 20 g Melissenbläder
  • 20 g Fenchelsamen

  • 1 uphümpelt Teelöpel vull vun disse Mischen in'n Mörser tweidrücken,
  • mit 1 Tass kaken Water övergeten,
  • 15 Minuten trecken laten,
  • afseihen.
  • Bet 5 Tassen vun dissen Tee an'n Dag drinken.

Melk to'n Helpen bi Menstruationsbesweer

  • 2 Teelöpel dröögt Gänsefingerkruut
  • mit ¼ l Melk to 'n Kaken bringen,
  • 5 Minuten trecken laten,
  • afseihen.
  • De Krüdermelk mit Honig un Zimt afsmecken.

3.9.2009


na baven