Dat Kruut för'n Heumaand:
Liebstöckel

vun Anke Nissen

Levisticum officinale — Familie Umbelliferae (Ammiaceae), Doldengewächse

 

 

 

Anner Namen:

De Liebstöckel-Wörtel

Baadkruut, Badekraut,
Gebärmutterwurz, Gichtstock,
Labstockkraut, Ladstöckel (Tirol), Laubstecken,
Lebensstock (Oberharz), Leibstöckele, Leppstock (Niedersachsen), Leverstock, (Westfalen), Lewerstock, Lewestecken, Lewesticken;
Liebesröhre, Liebesrohr, Liebesstückel (Schlesien), Liebstengel (Eifel), Liebstengelkraut, Liebstengelwurzel, Liebstockkraut, Liebstockwurzel, Lippstock Liestewurz, Lobstichel,
Lubbestock, Lübbesticke (richtige Bezeichnung), Lübberstock, Lübstock (Mecklenburg), Lüppsteckel, Luixenstickel, Luststecken, Lustock, Luststöckel,
Maggikraut, Maggikruut, Maggiplant, Maggipflanze,
Nengstechel, Nervenkräutel, Rübestöckel,
Saukraut, Sauerkrautwurz, Schluckwehrrohr, Schluckenwehrrohr, (Lingusticum levisticum) Wasserkraut.

Sammelt warrt:

Wörtel (Radix levistici); in'n September bet Oktober vun Planten, de 2 bet 4 Johr olt sünd
Warrt bruukt:
 drifft Water (Harn) ut'n Liev,
as Gewürz, in Likör un Snaps (Magenbitter)

So warrt't anwennt:

1 Eetlöpel dröögt Wörteln in 1/8 l hitt Water uttrecken laten, an'n Vörmiddag na un na drinken.

Ok in Teemischungen:

  • 10 g Liebstöckel
  • 10 g Hauhechel
  • 10 g Süßholz
  • 10 g Wachholderbeern
  • goot mischen. 1 Teelöpel vull vun disse Mischung för 1 Tass Tee nehmen.

 

Hett de Naam vun den Liebstöckel wat mit de Leev to doon? Dat schient so, aver de Herkunft vun den Namen is wohrschienlich anners. "Luppistechal" is en olt-hoochdüütsch Wort un bedüüdt Medizinbeker (Arzneibecher).

"Levisticum officinale" — Levisticum kümmt ut dat Griechische un bedüüdt "ut Libyen stammend".
Över 45 Namen heff ik för dit Kruut tohoop funnen.

De Plant warrt 2 Meter hooch. Se rüükt stark aromatisch, binah as de Angelikawörtel. De Stengel sünd hohl, de Blöden geel.

Plinius, de Hillige Hildegard un vele annere schrieven Godes över unsen "lubesteckl".
Odo Magdunensis schrifft över "das" Liebstöckel:

"...treibt ferner den Harn und sorgt für geordnete Monatsblutung."

Wieldat de Plant so fein rüken deit (se rüükt na Maggi, d.h. in Wohrheit rüükt natüürlich Maggi na Liebstöckel ), hett man se in't Middelöller geern to'n Schäperstunn mitnahmen. Aver mit de Leev un den Leev-Kraam hett dit Kruut nix to doon.

Fröher wörr Liebstöckel an Maria Himmelfohrt weiht — jüst so as anner Krüder ok. Dit weihte Kruut hett man denn in't Finster hangt. Dat schull helpen gegen Unweder.

Uns Vöröllern glöven:
Wokeen sik Liebstöckel an'n Himmelfohrtsdag up'n Rüüch bunnen harr, kreeg keen Krüüz-Pien — hett man glöövt.

Wenn man sik mit Liebstöckel de Fööt inreven harr, wörr man nich vun Slangen beten — hett man glöövt.

Wenn man afnehmen wull, denn müß man ene Liebstöckelwörtel utgraven, wenn de Maand in't Teken vun'n Widder stünn. Disse Wörtel müß man denn as Amulett üm'n Hals dregen. Un dat sull helpen, de Punnen vun'n Lief to bringen — hett man glöövt.

Wenn man Melk dörch enen Stengel vun'n Liebstöckel drinken dee — so as hüüt dörch enen Strohhalm —, denn schull dat helpen gegen Halsweh un Hoosten.

De Hexen hebbt den Stengel vun'n Liebstöckel as Pusterohr bruukt. Se hebbt dormit up Minschen schaten mit Hoor, Arfen orrer lütt Höhnerbeen.

 

Liebstöckeltee...
...to'n Dörchspölen vun Blaas un Nieren:De Liebstöckel-Wörtel

  • 1 - 2 Teelöpel lütt sneden Liebstöckelwörtel
  • 1 Tass kaken Water
  • todeckt 15 Minuten trecken laten,
  • afseihen.
  • To elkeen Tass vun dissen Tee sull man en Glas Water drinken!

Disse Tee is nich to bruken, wenn de Nieren entzündt sünd, un ok nich, wenn en Fru Mutter warrn sall.


Liebstöckeltee...
...de helpen kann bi Entzünden vun de Blaas un bi Reizblaas:

  • 1 bet 2 Teelöpel lütt sneden Liebstöckelwörtel
  • 1 Tass kolt Water övergeten
  • to'n Kaken bringen,
  • afseihen.
  • Elkeen Dag twee Tassen vun dissen Tee drinken.
  • To elkeen Tass vun dissen Tee sull man en Glas Water drinken!

Disse Tee is nich to bruken, wenn de Nieren entzündt sünd un ok nich, wenn en Fru Mutter warrn sall.

Teemischung...
...goot to bruken bi chronisch Blasenlieden:

  • 10 g Liebstöckelwörtel
  • 10 g Birkenbläder
  • 10 g Bärentraubenbläder
  • 10g Goldrutenkruut
  • 10 g Löwenzahnwörtel
  • 10g Anis-Samen
  • 10 g Hauhechelwörtel
  • 10 g Berberitzenwörtel
  • 10 g Wacholderbeeren
  • 10 g Thymiankruut
  • 1 Eetlöpel vun diss Teemischung mit 1 Tass kolt Water övergeten,
  • 6 bet 8 Stunnen trecken laten,
  • kort warm maken,
  • afseihen.
  • Över twee Weken — elkeen Dag — 2 Tassen vun dissen Tee drinken.
  • To elkeen Tass vun dissen Tee sull man en Glas Water drinken!

Hüüt warrt Liebstöckel geern in'n Kökengoorn plant.
Wegen sienen Maggi-Smack warrt de Bläder — dat Kruut — as Suppenkruut bruukt.

Liebstöckel as Kökengewürz passt goot to Gemüüs, Gemüüs-Suppen, Fleeschbröh, Eintöpfe, Omeletts, Rührei, Kartüffelsalaat.
Wegen dat intensiv Aroma sull Liebstöckel blots sporsam dosiert warrn.

Liebstöckel kann man goot infreren, de Smack ännert sik kuum.


na baven