Biblische Planten:
Mariendistel
Silybum marianum
Familie: Korbblütler = Asteraceae = Compositae

vun Anke Nissen

De Distel — so ganz allgemein — is ene Plant, de in de Bibel nöömt warrt, de in de Bibel vörkümmt.

Wi Minschen, wi leevt nich in't Paradies. Nee, wi mütt uns elkeen Dag ganz schön afmöhen, dat wi över de Runnen kaamt, dat wi satt to eten hebbt. Dit Möhen warrt in de Urgeschicht vun de Bibel beschreven. 1. Mose 3, 18:
"Mit Möhsal sallst du di vun'n Acker ernähren dien Leven lang,
un de Acker warrt Dornen un Disteln drägen."

Distel so ganz allgemeen

Siet Dusende Johren gifft dat al de Distel. Se tellt to de Unkrüder. Orrer beter to de Wildkrüder. In de letzten 60 Johr — also na dat End vun den 2. Weltkrieg — sünd de "Unkrüder" vun uns Minschen düchtig daldükert worrn, düchtig bekämpft worrn. Dorto kümmt, dat Hofplätze, Straten un Weeg jümmers mehr befestigt warrt, asphalteert, plaastert. "Uns Dörp sall schöner warrn" is dat Motto. Uns Distel hett dor denn nix to söken, se hett dat swor, dat gifft lang nich mehr so vele vun ehr.

De Distel is Futterquell för Bienen Hummeln, Bottervagels. En Bottervagel hett sogoor sienen Namen na disse Plant, de Distelfalter. Siene Rupen leevt up Disteln. Sie möögt dat, wenn't stachelig is, se freet de Stickeln.

Un de Samen vun Disteln sünd de Lievspies vun enen lütten hübschen bunten Vagel, den Distelfink. He is överall dor to finnen, wo Disteln gern wasst. Un wenn de Distelsamen riep warrt, kann man of ganze Swärme vun Finken sehen, de de Disteln plünnert.

Man — vertellen will ik ja vun de Mariendistel. Disse Plant heff ik al oft in'n Bibelgoorn funnen. Maria warrt vun vele Minschen verehrt, un dorüm warrt ok disse olle Heilplant vun vele Lüüd verehrt.

De Legende seggt: Up de Flucht na Ägypten hett Maria ehren lütten Jungen de Boss geven. Dorbi sünd poor Drüppen vun ehre Muddermelk up disse Plant fullen. Dorvun hebbt de Mariendistel-Bläder helle Placken kregen, de se bet hüüt behollen hebbt.

In miene ollen Krüderböker warrt de Mariendistel "Vehedistel" nöömt.

"Sie hält stets Wasser auf den breiten Blättern am Stängel. Die Blätter sind scharf, stachlig mit vielen weißen Flecklein besprengt. Die Vehedistel trägt oben auf allen Ästlein stachlige, rosenrote Köpfe, ringsherum mit langen Dornen besetzt..."
(na Adam Lonitzer)

Hillig Hildegard hett de Vehedistel gegen "Seitenstechen" anwendt. In dormalig Tieden hett man dormit mehrst Lungenentzünden orrer Rippenfellentzünden meent. Und de Grund för dit Anwennen weer wohrschienlich, dat man glöövt hett, wenn de Plant sülms steken kann — un dat kann de Mariendistel würklich — denn kann se ok gegen Steken in'n Liev helpen (Analogsluss).

Ok Paracelsus (1493-1541) hett de Mariendistel as Mittel gegen "inneres Stechen" bruukt.

Siet dat 18. Johrhunnert warrt disse Plant bi Leber-Besweer anwendt.

Uns Mariendistel is en staatsche Plant. Se kann bet 1,50 m groot warrn. Ehre Bläder sünd gröön-witt marmoreert, mit dornig gezähnten Rand. Baben up den Stängel sitt en kugelig, purpurfarven Blödenkorvmit dornig gezähnten Rand. De Bläder sünd gröön-witt marmoreert.

Blöhen deit de Plant vun Juni bet August.

Sammelt warrt de Früchte, de Archänen (Fructus cardui marianae). Se hebbt en harte, Schale un sowat, as en siedig glänzen Hoorkrone.
Disse Samen wörrn "Marienkörner" nöömt. Se wörrn hier bi uns in Schleswig-Holstein bruukt as Heilmittel bi Lungen-Lieden un bi Besweer vun de Leber.

Blööt un Frücht vun de Mariendistel

De Mariendistel is en Plant, vun de seggt warrt, dat se unse Leber schützen deit. Präparate, de Mariendistel-Wirkstoffe in sik hebbt, sullen vun'n Arzt verschreven warrn.

Bi Gallenbesweer un Probleme bi't Verdauen warrt geern en Tee ut Mariendistel drunken.

Tee, de uns Leberfunktion un Gallensaftbilden ünnerstützt:

• 1 Teelöpel Mariendistelfrüchte mit
• 1 Tass Water
• 8 Minuten lang kaken
• Elkeen Dag dissen Absud drinken.

De Körpertemperatur sall dörch dissen Drunk beten wat dalgahn.

Tee ut de Früchte vun uns Mariendistel smeckt fettig, dorüm sull man up 1 Teelöpel Mariendistelfrüchte jümmers 1 Teelöpel Fencheltee togeven.

Nix an de Mariendistel is giftig, ehre Stacheln aver könnt ganz schön pieken.

Distel. Foto AN

De Mariendistel warrt geern as Zierplant utseiht. To Recht, so meen ik, denn dit is ene wunnerschöne Distel, se warrt aver blots een bet twee Johr olt. Und se mag dat, wenn't warm is.