Dat Kruut för'n Harvstmaand:
Thymian

vun Anke Nissen

Thymus vulgaris, Familie Labiatae

 

Anner Namen:

 

 Gartenthymian, Römischer Quendel
Chölm, Demut, Immenkruut (Immenkraut), Kunerle, spanisches Kutelkraut, Zimis, Zimmeslein.
Sammelt warrt:
 Bläder (Herba Thymi) in'n Mai un Juni

Warrt bruukt:
  • lööst Hoosten un beruhigt, goot bi Keuchhoosten (Ätherisches Ööl)
  • As Kökengewürz
  • To'n Baden

So warrt't anwennt:

 1 Teelöpel mit ¼ l kaken Water övergeten, 10 Minuten todeckt trecken laten.

Sirup gegen Hoosten: 50 g Thymian mit ½ l Water utkaken, dörch en linnen Dook geten, mit 200 g Kandis to Sirup inkaken.
Af un to enen Teelöpel vull dorvun nehmen.

As Thymianööl (Oleum Thymi) in Mundwater un Zahnpasta (antiseptisch)

Mi gefallt ganz besünners de Naam, de de Volksmund disse Plant geven hett: "Demut".
Mi gefallt ok, dat de oll römisch Dichter Vergil vele vun seine Warken blots schreven hett, wiel he dörch den ganz spezifisch Duft vun Thymian dorto anreegt worrn is — so heff ik leest.
In't Middelöller gell Thymian as en Plant, de den Minschen mutig maken kunn.

Siet mehr as 4000 Johr warrt Thymian as Gewürz un as Heilkruut bruukt. De ollen Ägypten hebbt dat Kruut jüst so kennt, as de Griechen un Römer.
Veel later — eerst in't 11. Johrhunnert — keem dit Heilkruut na uns. Albertus Magnus un Hildegard von Bingen hebbt dat nütt.

De Naam sall vun dat griechisch "thein" stammen, wat so veel as rökern bedüüdt un ok vun "Thymiana", dat bedüüdt: Krüder to'n Rökern.

In dat oll "Kreutterbook" vun Leonhart Fuchs steiht warrt vun "Thym" schreven:

"Welscher oder Römischer Quendel würdt nit unbillich also genennt,
dann er ist mit gestalt der blettlin /
und dem geruch /
unserm Teiitschen [deutschen] Quendel ganz gleich ——"

"Der Thym ist bequem unnd nützlich denen so keichen [keuchen] und einen schweren atemb haben ——"

Thymian reegt den Appetit an. Dorüm sull dit Kruut veel bi't Kaken as Gewürz togeven warrn.
Leonhart Fuchs hett al 1543 schreven:

"Thym gestossen zu pulver und mit salz vermischt /
zu der speis genützt /
macht lust zu essen ——"

Dat ätherische Thymianööl warrt ut blöhen Thymian herstellt.
In uns' Familie warrt Thymianööl veel bruukt. Wenn jichtens en Enkelkind verköhlt is, warrt nachts natte Döker üm 't Bett hangt. In en Schöttel mit Water kaamt en poor Drüppen Thymianööl (wi kööpt Thymianööl in en Afthek). Wieldat wi Thymian nich so geern rüken möögt, kaamt noch en poor Drüppen Kiefernööl (kann ok en anner Ööl wesen, as Bispill Lavendel) dorto. Denn drückt wi Döker in dit Water ut, wi nehmt geern Stoffwinneln, un hangt de üm dat Bett vun't verköhlt Kind..


Thymian-Bad

Kann helpen, wenn de Huut reizt is,
linnert Besweer dörch Rheuma, dörch Hoosten;
ok wenn de Minsch nervöös is, kann't beruhigen.

  • 100 g Thymian mit 1 Liter hitt Water övergeten.
  • 20 Minuten trecken laten, denn afseihen.
  • Dissen Sud to dat Baad'water in de Wann geten.

Tymian-Zitronen-Drank

Helpt goot, wenn't Hoosten weh deit und dat Atmen swoor is.

  • 30 g Thymian mit 20 g Zitronenboombläder mischen.
  • Mit 1 Liter hitt Water övergeten.
  • Wenn de Sud blots noch lauwarm is, afseihen...
  • ...un dreemal an'n Dag en Tass dorvun drinken

Ysop-Thymian-Tee

Helpt heel goot bi krampfig Anfäll, as Hoosten, Koliken, orrer ok Menstruationsbesweer.

  • 30 g Thymian
  • 30 g Ysop
  • 20 g Johanniskruut
  • 20 g Andorn

mischen.

För een Tass Tee:

  • 2 Teelöpel vun diss mischt Krüder mit hitt Water övergeten,
  • 5 Minuten trecken laten, afseihen.
  • Morgens un avends je 1 Tass drinken.

Tee gegen Asthma

Diss Tee helpt goot bi Asthma, linnert de Besweer:

  • 30 g Thymian
  • 10 g Sonnentau
  • 50 g Meisterwurz
  • 30 g Majoran

mischen.

För ene Tass Tee:

  • 2 Teelöpel vun disse mischt Krüder mit hitt Water övergeten.
  • 5 Minuten trecken todeckt laten, afseihen.
  • Över'n Dag bet to 7 Tassen dorvun drinken.


na baven