Dat Kruut för'n Oostermaand:
Waldmeister

vun Anke Nissen

Asperule odorata; Familie der Krappgewächse, Rubiaceae

Gliedkraut, Gliedegänge, Halskräutlin, Herzfreide (nich Herzfreude!), Leberkraut, Sternleberkraut, Teekraut, Unser-lieben-Frauen-Bettstroh,
Määsch, Möske, Möserich, Möschen, Meisch, Meister.

Plattdüütsch: Möösch, Määsch, Mäschen, Mäusch, Mäuschen, Musch, Müschen

• dat frisch Kruut: to Maibowle, Maiwien, Maiwienessenz.
• Dat dröögt Kruut: in Krüderkissen.
• As Tee, to'n Blootreinmaken.

Tee, to 'n Bloot rein maken:

• 1 Eetlöpel lüttsneden Kruut
• mit ¼ Liter hitt Water övergeten.
• Afgeten, in'n Loop vun 'n Dag drinken.

Een sull dat 4 Weken lang maken, in'n Marz, as Fröhjohrskur, man ok in'n Oktober noch mal.

Vör Johren heff ik mal enen Krüder-Rate-Adventskalenner maakt. Dor stünn achter de Döör Nr. 6:

Wat för en Plant is dat, de dor seggt:
"Fröher heff ik Motten ut den Klederschrank wegjaagt.
Vele Lüüd möögt mienen fienen Smack in Form vun en erfrischen un anregen Drunk in de Maientiet.
Ok Dr. Oetker weet mien angenehm Aroma to nütten.

Natürlich weer dat de Waldmeister, de to raden weer.

De Waldmeister hett en kriechen Wörtelstock, ut den rut drifft he enfache, veerkantig Stengel, an de in Quirlen de Bläder staht.
Disse Quirle bestaht ünnen ut 6, baven ut 8 hellgröön, lanzettlich Bläder.
De Waldmeister blöht in'n Mai un Anfang Juni. De sneewitt Blöden sitt ganz baven.
Wi findt em överall in Düütschland in 't Holt, wo dat so 'n beten natt is.

Waldmeister hett en ganz speziellen Ruuch, ik meen, enen heel angenehm Ruuch. He kümmt tostann dörch dat Cumarin, dat in em binnen is.

As Heilplant hett Waldmeister hüüt keen Bedüden. Man wi alltohoop kennt den

• Waldmeister-Smack in de Maibowle,
• in de gröön Götterspies (Wackelpudding),
• in de Gummiteddys...

Hieronymus Bock hett 1551 över den Waldmeister schreven:

"Die Unseren brauchen dass Kraut allermeist in Maien,
in Wein gelegt und darüber getrunken soll das Herz erfreuen
und der versehrten Leber wieder aufhelfen."

In’t Südollenborger Plattdüütsch bröcht vun Ludgerd Lüske:

“Use bruukt dat Kruut heel meest
schall maitiedens in Wien inleggt
un denn drunken dat Harte fraien
un dei sehre Läver wedder uphelpen.“

De Buurn bruken Möösch — Waldmeister — as Mittel gegen Dörchfall bi de Kalver.

As ik noch en Kind weer, hebbt wi geern Kränze ut dat Kruut bunnen. Mien Grootmudder leet en Mööschkranz dat hele Johr in de Stuuv an de Wand hangen. Ik glööv, se weer de Meen, dat weer en Mittel gegen Motten.

Se sä, dat dat Glück bringt, wenn een Möösch an'n Avend vör den 1. Mai plückt.
Se sä ok, dat de Duft vun 'n Waldmeister verswindt, wenn Hexen up ehre Bessen dor över wegreden weern.

Mai-Wien

• 100 g frisch Waldmeisterkruut
• mit 1 Liter Wien övergeten un trecken laten — man nich länger as 15 Minuten, anners warrt de Wien krutig smecken!
• Disse konzentreert Waldmeister-Uttoog reckt för 5 Buddels Wien.

Mai-Wien-Essenz

• 1000 g lütt hackt Waldmeisterkruut
• mit 2 Buddels Wittwien un ½ Liter Wienbrand övergeten
• 1 bet 2 Stunnen trecken laten,
• utpressen,
  dörch en Filter geten (ik nehm geern en Melitta-Filtertüüt).
• Wenn een mag: noch 5 Gramm Cumarin togeven.

Waldmeisterbowle

So an'n End vun 'n April orrer ok Anfang Mai gah ik in dat Lauer-Holt. Dor kenn ik Plackens, wo de Waldmeister düchtig an 't Wassen is. Ik plück ganze Stele, de aver noch nich blöhen dörvt. Ik bind de mit enen Faden tosamen, as so 'n Strüschen, spööl de goot af un hang de in den Bowlen-Pott. Dor geet ik en Buddel Wien över un do ok poor Teelöpel Zucker mit rin, männichmal ok ene Prise Vanillezucker. Ik laat den Strüschen so 1½ Stunnen dor in hangen. Denn drück ik em goot ut un nehm em rut.

Nu kaamt drei Buddels lichten Wien — ik nehm Kabinett — dorto un an'n Sluss — also kort vör 't Servieren — en Buddel goot köhlt Sekt.
Hmmmm — ik krieg al Appetit, wenn ik dat hier blots upschrieven do...