Luftakrobaten 2019

In de verleden Johrn sünd uns flegen Insekten gewaltig trüchgahn. Al siet 'n Tied maakt de oostfreesche Hobbyfotograf Thomas Seemann Insektenfotos för Fotokalenner, de sien Team "Tandem"/OBW rutgifft. Verleden Johr hebbt wi mit düsse Fotos en Kalenner uns Bottervagels toegnet. Düt Johr schall dat üm annere Luftakrobaten in Pagels' Goorn gahn.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Februar-Akrobat:
Honnig-Imm op Krokus

vun Thomas Seemann un Marlou Lessing

Hüüt sünd wi mal optimistisch un wählt för den Februar de eerste Honnig-Imm op de eersten Krokusse vun't Johr. Dat Foto woor natüürlich beten later in't verleden Johr opnahmen — avers wi bruukt nu an'n Utgang vun'n Winter en beten Lent-Geföhle!

De Februar is aver nich de Maand för Honnigimmen. Opstunns sünd se noch in Winterroh in ehrn Stock, Dusende Immen tosamen in en Aart Druuv. De Königin sitt in de Merrn vun de Druuv, un de Immen warmt den ganzen Immenbulten af un an dör Bewegen vun ehr Flögelmuskeln. So kann nüms verfreren; liekers stravt mennig Immen in'n Winter dör Entkräftung.

De Immen fleegt eerst ut, wenn dat stüttig 10°C warm is, denn se köönt — anners as Hummeln — nich ziddern. Hummeln köönt mit'n Achterliev bibbern un so beten Warms tostannbringen; Immen sünd, wenn dat miteens küll warrt, hülplos un mööt so gau as mööglich trüch in'n Stock flegen. Wenn se dat nich schafft, starvt se. Allto nieschierige Immen passeert dat. Dorwegen fleegt se to Sekerheit nich bi den eersten Sünnenstrahl. Nich all Immen — welk blievt ok un bewacht den Stock, anner pleegt de Brood; denn de Königin leggt denn dääglich wedder Hunnerte Eier.

De Honnigimm in't Bild to finnen is nich licht. Hier is en Vergröttern:

De Honnigimm is eng verwandt mit de Wildimmen, dat gifft avers gewaltige Ünnerscheed:

  • Wildimmen leevt enkelt, Honnigimmen köönt bloots in de Gemeenschap överleven. Warrt en Imm vun ehr Volk isoleert, dennso starvt se, ok wenn se Obdack, Foder, Warms un allens hett. Se bruukt ehr Süstern! Kannst meistto seggen, dat levensfähige Deert is nich de enkelte Imm, sünnern dat Volk.
  • Ok Honnig to maken un grote Vörrääd antoleggen is en Opgaav för en Gemeenschap. De enkelt leven Wildimm bringt sowat nich tostann.
  • De Honnigimm is meddewiel hoochtücht, dat gifft bloots en Dutz Aarten. Vun de Wildimmen gifft dat Dusende Aarten, de ok ganz ünnerscheedlich utseht.

All Immen hebbt grote Malesch mit de intensive Landweerschap. Wischen warrt meiht, ehrdat se blöhn köönt, Reesenfeller warrt in'n Juli batz afmeiht, un nix is mehr dor: Immen hungert meddewiel op't Land! In de Städer dorgegen blöht meist to jede Tied in Goorns, Parks orr op Balkone wat. Honnigimmen warrt dorwegen mehr un mehr ok in de Städer hollen. Noch en Vördeel: Dor sünd keen Pestizide bi!

Nich een Deert,
sünnern
Deel vun wat
wat grötter is
as Du:
lehr uns
verstahn,
dat ok wi
Delen sünd
vun wat,
wat grötter is
as wi:
Ok wi
sünd Delen
vun dien Volk.

3.2.2019


na baven