Luftakrobaten 2019

In de verleden Johrn sünd uns flegen Insekten gewaltig trüchgahn. Al siet 'n Tied maakt de oostfreesche Hobbyfotograf Thomas Seemann Insektenfotos för Fotokalenner, de sien Team "Tandem"/OBW rutgifft. Verleden Johr hebbt wi mit düsse Fotos en Kalenner uns Bottervagels toegnet. Düt Johr schall dat üm annere Luftakrobaten in Pagels' Goorn gahn.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Dezember-Akrobat:
De Buchsboomzünsler

vun Thomas Seemann un Marlou Lessing


Wunnerschöön, nich? Op en ockerfarbig Wand hett sik düsse smucke Falter sett, as wüss he, dat sien binner Farv dat Ocker spegelt un dat Bruun vun sien Rand dormit in Harmonie steiht. De langen Föhlers hett he för sien Porträt elegant, man symmetrisch un bewusst anmodig över den Rüch foolt. — Wat hier so dekorativ in de Sünn sitt, is de Buchsboomzünsler, de Schrecken vun Goorn- un Heckenbesitters.

Ja, de smucke Falter kümmt ut Asien, he woor hier vör etwa 10 bit 20 Johr insleept. Siet de Tied hett he sik ganz orrig utbreedt, leevt in ganz Europa un sorgt överall för kahle Buchsboomhecken. Dat heet, sien Ruup deit dat. Denn de wunnerschöne bruun-witte orr bruun-ockerfarbig Falter hett bloots en Levenstied vun 8 Daag! Düsse korte Tied is eendüdig för Sex un Eiaflaag vörsehn; de Eier leggt Madam Zünsler natüürlich an Buchsboombläder af. Dorna is ruckzuck de Levensopgaav erfüllt, un dat geiht af in de ewigen Bläderfreet-Gründe, also an't Starven. In't Düssiets sünd de Junior-Zünslers, also de grönen Rupen, bald ut de Eier sluppt un freet sik mit Kattun dör den Buchsboom, bet se fief Zentimeters lang un drall sünd. De Boom höllt dat nich lang ut. Griese, afstorven, "verdröögte" Buchsbööm sünd enerwegens bi uns to sehn, sietdat düt Insekt Europa för sik entdeckt hett.


De Ruup vun'n Buchsboomzünsler bi de Arbeit.
Ja, de jungen Bläder smeckt allerbest!

Un dat is nich etwa de ganze Johrszyklus vun den Zünsler, nee! Dat is en flietig Deert, also ran an't Verpuppen un de neegste Faltergeneraschoon in de Luft entlaten! All twee Maanden kann en niege Generaschoon sluppen, veer bet fief Generaschoonen per Johr. Effizienz pur. Keen Wunner nich, dat de Zünsler sik so gau utbreiden kunn! Wat he nu en grote Fleegkünstler, also Luftakrobat, is, dat weet ik nich genau; man bedenkt Se, he leevt bloots 8 Daag in sien Flögelgestalt! Dor köönt wi dat nich so genau nehmen. Op jeden Fall zünselt he, wat dat ok heten mag, denn en Zünsler mutt doch zünseln, nich?

Wat gegen den Zünsler helpen deit, dor gifft dat veel, vun Chemie anfungen bet hen to Amseln, Mieren un anner Insekten, de sik de fetten Rupen geern smecken laat. Ja, för de Vagels is dat en willkamen Twischenmahltied, en Asia-Snack sotoseggen. De Zünsler warrt so bald nich mehr ophöörn, bi uns to zünseln, avers he hett even ok sien Godes.

funnen land
minschen rammt
ehr fahn dor in den borrn
du
dien tähn in de planten

natuur kennt keen egendom
allens is funnen
un höört den finner to
so lang he dat bruken kann

"befall" nöömt wi
dien landnahme
wi kennt uns ut
schädlinge ok wi


Foto Ruup: zimt2003

2.12.2019


na baven